जळगाव (प्रतिनिधी) नमाज पठणाला जावून येतो म्हणून घराबाहेर पडले, अन् त्यानंतर दुकान मालकाने दुकानातच जावून गळफास घेत आत्महत्या केल्याची धक्कादायक घटना शहरातील पिंप्राळा हुडको येथे समोर आली आहे. शेख शाबीर शेख कादीर (वय-५५, रा. पिंप्राळा हुडको, जळगाव) असे मृताचे नाव आहे.
या घटनेबाबत पोलीस सूत्रांकडून मिळालेल्या माहितीनुसार, शेख शबीर शेख कादीर हे पिंप्राळा हुडको येथे पत्नी व दोन मुलांसह वास्तव्याला आहेत. याच भागात त्यांचे किराणा मालाचे दुकान असून त्यावर ते उदरनिर्वाह करतात. दरम्यान, सोमवारी १८ एप्रिल रोजी सकाळी ८ वाजता शेख शबीर हे उठल्यानंतर नमाज पठणाला जातो असे सांगून ते घराबाहेर पडले. बराच वेळ झाल्यानंतर ते घरी आले नाही म्हणून त्यांच्या मुलाने किराणा दुकानात जावून पाहणी केली असता शेख शबीर यांनी दुकानातच गळफास घेवून आत्महत्या केल्याचे उघडकीला आली.
आत्महत्या करण्याचे कारण अद्याप कळू शकले नाही. नातेवाईकांनी तातडीने मृतदेह खाली उतरविला व जिल्हा शासकीय वैद्यकीय महाविद्यालयात दाखल केले असता वैद्यकीय अधिकारी यांनी मयत घोषीत केले. याप्रकरणी रामानंदनगर पोलीस ठाण्यात अकस्मात मृत्यूची नोंद करण्यात आली आली. या घटनेचा प्राथमिक तपास पोलीस कर्मचारी निलेश पाटील व अजय सपकाळे करीत आहे.
