गंगापूर (वृत्तसंस्था) गावठी कट्ट्यासोबत खेळत असलेल्या अडीच वर्षीय बालकाच्या हाताने ट्रीगर दबल्याने कट्ट्यातील गोळी कपाळात घुसल्याची धक्कादायक घडली आहे. ही घटना शुक्रवारी सायंकाळी ६ वाजता शहरातील अहिल्यादेवीनगर येथे घडली. जखमी बालक सध्या घाटी रुग्णालयात मृत्यूशी झुंज देत आहे.
राहुल राठोड (३०, रा. अहिल्यादेवीनगर, गंगापूर) हे एका फायनान्स कंपनीत काम करतात. सायंकाळी ६ वाजता त्यांचा अडीच वर्षीय मुलगा गावठी कट्ट्याशी खेळत होता. खेळता-खेळता अचानक त्याच्या हाताने खटका दाबला गेल्याने कट्ट्यातील गोळी थेट कपाळाच्या मधोमध शिरली. यात तो गंभीर जखमी झाला. बंदुकीच्या आवाजाने नागरिक भयभीत होऊन घराकडे धावले. जखमी अवस्थेत बालकाला घाटी रुग्णालयात दाखल करण्यात आले. घटनेनंतर उपविभागीय अधिकारी प्रकाश बेले, निरीक्षक सत्यजित ताईतवाले, उपनिरीक्षक दीपक औटे यांनी घटनास्थळाला भेट देऊन पंचनामा केला. घरात गावठी कट्टा व दोन जिवंत काडतुसे आढळून आली आहेत.
