जळगाव (प्रतिनिधी) शहरातील समता नगर भागातील रहिवासी असणाऱ्या तरूणावर चाकूहल्ला केल्याने त्याचा मृत्यू झाल्याची धक्कादायक घटना घडली. यामुळे परिसरात खळबळ उडाली असून यात एक आरोपी निष्पन्न झाल्याची माहिती सूत्रांनी दिली आहे.
यासंदर्भात अधिक असे की, शहरातील समता नगर भागातील डॉ. बाबासाहेब आंबेडकर यांच्या पुतळ्याजवळ सागर नरेंद्र पवार (वय २८) हा तरूण एकटा राहत होता. रात्री उशीरा त्याच्यावर एकाने चाकूहल्ला केल्याने यात तो गंभीर जखमी झाला. त्याच्या किंचाळ्या ऐकून परिसरातील नागरिकांनी त्याला तातडीने रुग्णालयात हलविले. येथे उपचार सुरू असतांना सकाळी पाच वाजता त्याने शेवटचा श्वास घेतला.
तरूणाच्या हत्येमुळे परिसरात प्रचंड खळबळ
सागर नरेंद्र पवार हा तरुण समता नगरात एकटाच राहत होता. कुणाच्या अध्यात-मध्यात नसणाऱ्या या तरूणाच्या हत्येमुळे परिसरात प्रचंड खळबळ उडाली आहे. पोलिसांनी घटनास्थळी धाव घेऊन तपासाची चक्रे फिरवली आहे. यात एक आरोपी निष्पन्न झाल्याची माहिती सूत्रांनी दिली आहे.
