उल्हासनगर (वृत्तसंस्था) रक्षाबंधन या दिवशी बहिण आपल्या भावाच्या मनगटावर राखी बांधतात आणि स्वतःचे रक्षण करण्याचे वचन घेतात. उल्हानगरमध्ये एका बहिणीनं आपल्या भावाला मूत्रपिंड दान करून रक्षाबंधनाची अनोखी भेट दिली आहे.
उल्हासनगर येथील अजय जैस्वानी इम्युनोलॉजिकल आजाराने पीडित होते, त्यासोबत त्याला ग्लोमेरुलोनेफ्रिटिस आजार झाल्याने त्याचे मूत्रपिंड निकामी झाले होते. अशा केसेस विशेषत: या वयोगटातील व्यक्तींमध्ये अंतिम टप्प्यामधील रेनल फेल्युअरच्या १२ टक्क्यांहून कमी प्रमाणात आढळून येतात. रूग्णाचे आरोग्य खालावत जात होते आणि दीर्घकाळापर्यंत वाट पाहिल्यास त्याच्या जीवाला धोका होता, त्यामुळे प्रत्यारोपण करणे आवश्यक होते. अजय यांची बहिण सपना यांनी त्यांचे जीवन वाचवण्यासाठी पुढाकार घेतला. रूग्णाशी बहीणीचे मूत्रपिंड परिपूर्णपणे जुळत असल्याचं निदर्शनास आल्यानंतर मुलुंड येथील फोर्टिस हॉस्पिटलमधील कन्सल्टिंग नेफ्रोलॉजिस्ट व ट्रान्सप्लाण्ट फिजिशियन डॉ. हरेश दोदेजा व त्यांच्या टीमने यशस्वीरित्या प्रत्यारोपण शस्त्रक्रिया केली.
कठीण काळादरम्यान माझ्या बहिणीने मला मोठा पाठिंबा दिला आहे. ती माझा आधारस्तंभ आहे आणि तिचा निर्धार व आत्मविश्वास पाहिल्यानंतर मला खात्री झाली की, मी या आव्हानावर मात करू शकतो. डॉक्टरांनी देखील आम्हाला खूप आधार दिला आणि दान व प्रत्यारोपण प्रक्रियेदरम्यान आमच्याशी समुपदेशन केले. मी माझे जीवन वाचवणारे फोर्टिस हॉस्पिटल येथील तज्ञांच्या टीमचे आभार मानतो, असे रुग्ण अजय जैस्वानी याने सागितले.
