फैजपूर (प्रतिनिधी) सतत आजारी राहणाऱ्या पोटच्या पाचवर्षीय मुलीला जन्मदात्या बापानेच विहिरीत फेकून खून केल्याची हृदयद्रावक घटना न्हावी (ता. यावल) येथे रविवारी उघडकीस आली. पोलिसांनी मुलीची हत्या करणाऱ्या बापाला अटक केली असून खुनाचा गुन्हा दाखल केला आहे. अनिता बारेला (५) असे मृत बालिकेचे, तर ठुशा भावलाल बारेला (३०, रा. गुलझरी, मध्य प्रदेश, ह.मु. न्हावी, ता. यावल) असे अटक करण्यात आलेल्या बापाचे नाव आहे. पोलिसांनी त्याला मध्य प्रदेशातून बेड्या ठोकल्या आहेत.
न्हावी येथील धीरज सुधाकर चौधरी यांच्या शेतात बारेला कुटुंब वास्तव्याला आहे. गुरुवार पासून (दि. १७) ठुशा बारेला व त्याची पाचवर्षीय मुलगी अनिता हे बेपत्ता होते. रविवारी दुपारी शेतातील विहिरीत अनिता हिचा मृतदेह आढळून आला होता. तर अनिता हिचा मृतदेह आढळल्यानंतर तिचे वडील बेपत्ता होते. त्यामुळे पोलिसांचा त्याच्यावरच संशय बळावला होता. ठुशा यास गुलझेरी (मध्य प्रदेश) येथून ताब्यात घेण्यात आले. चौकशीत त्याने गुन्ह्याची कबुली दिली.
अनिता ही कायम आजारी असायची. त्यामुळे पत्नीही वारंवार तिला दवाखान्यात नेण्यासाठी आग्रह धरायची. त्याचाच राग येऊन आपण हे कृत्य केल्याचे त्याने पोलिसांना सांगितले. फैजपूरचे डीवायएसपी डॉ. कुणाल सोनवणे, एपीआय नीलेश वाघ, उपनिरीक्षक मयनोद्दीन सय्यद, सहायक फौजदार देविदास सूरदास, महेंद्र महाजन, गुलबक्ष तडवी, सुशीला भिलाला यापथकाने या गुन्ह्याचा उलगडा केला.
