जळगाव (प्रतिनिधी) जिल्ह्यातील सेतू सुविधा केंद्र सुरू करण्यात यावे, अशी मागणी जळगाव शहर काँग्रेस कमिटीचे महानगर जिल्हाध्यक्ष अमजद पठाण यांनी जिल्हाधिकाऱ्यांकडे एका निवेदनाद्वारे केली आहे.
निवेदनात म्हटले आहे की, जनतेच्या संबंधित विविध प्रमाणपत्रांचे दाखले, सात बारा, आठ अ हे जळगाव जिल्ह्यामध्ये महा ई सेवा केंद्रामार्फत दिल्या जात आहेत. परंतु जनतेने महा ई सेवा केंद्र चालक हे वाजवी दरापेक्षा जास्त प्रमाणात पैसे घेतात. प्रमाणपत्र वितरीत करण्यात अडवणुक करून आर्थिक लुबाडणूक करतात व प्रमाणपत्रही वेळेवर दिल्या जात नाहीत, अशा तक्रारी केल्या आहेत.
उपरोक्त नमुद तक्रारींच्या अनुषंगाने महा ई सेवा केंद्र (आपले सरकार सेवा केंद्र) यावर कोणतेही नियंत्रण नसल्याचे स्पष्ट आहे. करीता महाराष्ट्र शासनाचे शासन निर्णयानुसार जिल्हाधिकारी यांचे अधिपत्याखालील तहसिल कार्यालयातील सेतु सुविधा केंद्र चालु करण्यात यावे. जेणेकरून जनतेची लुबाडणूक न होता शासनाने निश्चित केलेल्या वाजवी दरामध्ये व विहीत मुदतीत जनतेला विविध प्रमाणपत्रांचे दाखले मिळतील. तसेच सदर सेतु सुविधा केंद्र हे तहसिलदार यांच्या निगराणीखाली असल्या कारणाने सदर सेतु संचालक हे जनतेची लुबाडणुक किया अडवणुक करणार नाहीत.
तरी आपण या सर्व बाजूंचा विचार करून महाराष्ट्रातील इतर जिल्ह्यात चालु असलेल्या सेतु सुविधा केंद्राप्रमाणे जळगाव जिल्ह्यात ही सेतु सुविधा केंद्र कार्यान्वीत करण्यासाठी नियमानुसार निविदा प्रक्रियेचा अवलंब करून कार्यवाही करावी, जेणेकरून जळगाव जिल्ह्यातील जनतेची आर्थिक लुबाडणूक अडवणुक थांबली जाईल, असे यात म्हटले आहे.
