
अमळनेर (प्रतिनिधी) – जळगाव जिल्हा मध्यवर्ती सहकारी बँकेच्या निवडणुकीत माघारीच्या टप्प्यावर राजकीय घडामोडींना वेग आला असताना भारतीय जनता पक्षाचे उमेदवार प्रफुल्ल पवार यांनी अमळनेर तालुका सोसायटी मतदारसंघात आपला उमेदवारी अर्ज मागे घेतल्याने राष्ट्रवादी काँग्रेस अजित पवार गटाचे आमदार अनिल भाईदास पाटील यांच्या पत्नी जयश्री अनिल पाटील यांची बिनविरोध निवड निश्चित झाली आहे.
जिल्हा बँकेच्या निवडणुकीत महायुतीच्या जागावाटपाचा फॉर्म्युला निश्चित झाल्यानंतर विविध मतदारसंघांतील उमेदवारांच्या माघारीकडे संपूर्ण जिल्ह्याचे लक्ष लागले होते. त्यात अमळनेर सोसायटी मतदारसंघातील भाजपच्या उमेदवाराची माघार महत्त्वपूर्ण ठरून परिणामी जयश्री पाटील यांच्या विजयाचा मार्ग मोकळा झाला.सदर बिनविरोध निवडीमुळे आमदार अनिल पाटील यांचे जळगाव जिल्हा बँकेतील वर्चस्व पुन्हा सिद्ध झाले आहे.
भाजप उमेदवाराचा अर्ज मागे होऊन जयश्री पाटील यांची बिनविरोध निवड निश्चित होताच.कार्यकर्त्यांनी अमळनेर येथे आनंदोत्सव साजरा केला.तर सर्व स्तरातून जयश्री पाटील यांच्यावर सत्काराचा वर्षाव झाला.यावेळी राष्ट्रवादी काँग्रेस पार्टीचे शहर व ग्रामीण पदाधिकारी, मार्केट संचालक, शेतकी संघ संचालक,न प चे नगरसेवक,जि प,प स चे माजी पदाधिकारी,वि का सोसायटीचे असंख्य पदाधिकारी, ग्रा.प.चे पदाधिकारी युवक कार्यकर्ते, महिला पदाधिकारी व हितचिंतक मोठ्या संख्येने उपस्थित होते.
जयश्री पाटील यांची सहकार क्षेत्रात एन्ट्री
आमदार अनिल पाटील यांचा सुरवातीपासून सहकार क्षेत्रात प्रचंड दबदबा राहिला असून बाजार समिती व जिल्हा बँकेत अनेक वर्षे त्यांनी प्रतिनिधित्व केले आहे.याशिवाय अमळनेर बाजार समिती व शेतकी संघ या दोन्ही संस्थावर आजही त्यांच्या नेतृत्वातील सत्ता आहे.जिल्हा बँकेत नव्या कायद्यामुळे आमदार अनिल पाटील यांनी यंदाच्या निवडणुकीत थांबण्याचा निर्णय घेऊन आपल्या सौभाग्यवती जयश्री पाटील यांना अमळनेर सोसायटी मतदारसंघात रिंगणात उतरवले होते.त्यांनी याआधी जिल्हा परिषद सदस्य व माजी नगराध्यक्ष म्हणून दोन्ही सभागृहात प्रतिनिधित्व केले असून राजकीय व सामाजिक क्षेत्रात एक अभ्यासू व कार्यक्षम महिला नेतृत्व म्हणून त्यांची ओळख आहे.यामुळे जिल्हा बँकेतील त्यांच्या उमेदवारीचे देखील अमळनेर तालुक्यातील मतदार व शेतकरी सभासदांनी स्वागत करून पसंती दर्शवली होती.त्यांच्या सुदैवाने शेवटच्या दोन दिवसात प्रतिस्पर्धी भाजप उमेदवाराने अर्ज मागे घेऊन जयश्री पाटील यांचा बिनविरोध निवडीचा मार्ग मोकळा केल्याने जयश्री पाटील यांच्या रूपाने सक्षम महिला नेतृत्वाची सहकार क्षेत्रात एन्ट्री झाली आहे.
















