जळगाव (प्रतिनिधी) शहरातील इच्छादेवी चौक ते डी मार्टपर्यंतचा रस्ता अतिशय खराब झाला असून भूमिगत गटारींचे काम झाले नसल्याने दुरुस्ती रखडली असल्याची माहिती नगरसेवकांनी दिली. उपमहापौर सुनील खडके यांनी लागलीच मनपा अधिकाऱ्यांना सूचना देत ईच्छादेवी चौफुली ते मेहरूण तलाव हा मुख्य रहदारीचा रस्ता असून रस्त्याच्या डागडुजीसाठी लवकरात लवकर भूमिगत गटारींचे काम करावे असे उपमहापौरांनी सुनिल खडके यांनी सांगितले.
तसेच मुख्य रस्त्यावरील विद्युत वाहिनी देखील २० दिवसाच्या आत स्थलांतरित करण्याचे आदेश दिले. ‘उपमहापौर आपल्या दारी’ उपक्रमांतर्गत उपमहापौर सुनील खडके यांनी प्रभाग १४ मधील विविध परिसराला भेट देत नागरिकांशी चर्चा केली. यावेळी त्यांच्यासोबत स्थायी समिती सभापती राजेंद्र पाटील, महिला व बालकल्याण सभापती रंजना सपकाळे, नगरसेवक सदाशिव ढेकळे, सुरेखा सोनवणे, सुनील पाटील, माजी स्थायी समिती सभापती ऍड. शुचिता हाडा, मिनाक्षी पाटील, आशुतोष पाटील, भरत सपकाळे, मनोज काळे, भूषण लाडवंजारी, उमेश सोनवणे आदींसह मनपा अधिकारी उपस्थित होते.
इंद्रप्रस्थ भवनजवळ प्रसाधनगृह उभारावे
रामेश्वर कॉलनीतील इंद्रप्रस्थ भवनलगत मोकळी जागा असून त्याठिकाणी प्रसाधनगृह उभारावे, अशी मागणी नागरिकांनी केली असता याबाबत योग्य कार्यवाही करण्याच्या सूचना उपमहापौर सुनील खडके यांनी दिल्या. रामेश्वर कॉलनीत नाल्याचे बांधकाम रखडले असल्याने ठिकठिकाणी पाण्याचे डबके साचून डास, मच्छरांचा त्रास होत असल्याची तक्रार नागरिकांनी मांडली. उपमहापौरांनी याबाबत तात्काळ ठेकेदाराशी बोलणे करून काम सुरू करण्याच्या सूचना केल्या. रुपसदन रिक्षा स्टॉपजवळ नाल्याला कठडा नसल्याने अपघाताची शक्यता असल्याचे नागरिकांनी सांगितले. उपमहापौरांनी मनपा अधिकाऱ्यांना सूचना देऊन योग्य व्यवस्था करण्याचे आदेश दिले.
रस्त्याच्या चाऱ्या योग्य पध्दतीने बुजवा
रामेश्वर कॉलनी, मेहरूण परिसरात अनेक ठिकाणी खोदलेल्या अमृत योजनेच्या चाऱ्या योग्य पध्दतीने बुजविण्यात न आल्याने पुन्हा खोल गेल्या असल्याचे नागरिकांनी सांगितले. आदित्य चौक ते डी-मार्ट रस्त्याची दुरवस्था झाली असून परिसरात अनेक ठिकाणी एलईडी नसल्याची समस्या नागरिकांनी मांडली. उपमहापौर सुनील खडके यांनी लागलीच अमृत योजनेच्या मक्तेदार प्रतिनिधीला याबाबत सूचना केल्या आणि रस्ते योग्य करून देण्याचे सांगितले.
