भुसावळ, (प्रतिनिधी) – SIR अभियान अधिक प्रभावी, समन्वयपूर्ण आणि सुकर व्हावे या उद्देशाने भुसावळ येथे आयोजित करण्यात आलेला SIR कामकाज संदर्भात समन्वय व मार्गदर्शन मेळावा उत्स्फूर्त वातावरणात संपन्न झाला. शासन-प्रशासन आणि प्रत्यक्ष क्षेत्रात कार्य करणाऱ्या सर्व घटकांना एकाच व्यासपीठावर आणून त्यांच्या समस्या जाणून घेण्यासाठी आयोजित करण्यात आलेला हा उपक्रम राज्यातील पहिलाच आणि आगळावेगळा उपक्रम ठरला.
कार्यक्रमाच्या अध्यक्षस्थानी महाराष्ट्र राज्याचे वस्त्रोद्योग मंत्री मा. ना. संजयजी सावकारे उपस्थित होते. त्यांनी SIR अभियानामध्ये कार्यरत असलेल्या BLO, BLA, आशा वर्कर, अंगणवाडी सेविका, सहाय्यक शिक्षक, निवडणूक कर्मचारी तसेच संबंधित सर्व घटकांच्या अडचणी आणि सूचना प्रत्यक्ष ऐकून घेतल्या. अनेक समस्यांवर तत्काळ संबंधित अधिकाऱ्यांना आवश्यक सूचना व आदेश देत त्यांचे निराकरण करण्यासाठी सकारात्मक भूमिका घेतली.
या मेळाव्याची संकल्पना भाजपा वैद्यकीय आघाडीचे उत्तर महाराष्ट्र संयोजक डॉ. नितु पाटील यांनी मांडली होती. त्यांच्या संकल्पनेला मा. ना. संजयजी सावकारे यांनी तात्काळ प्रतिसाद देत अल्पावधीत या उपक्रमाचे आयोजन केले. त्यामुळे SIR अभियानात कार्यरत असलेल्या विविध घटकांना एकत्र येऊन अनुभवांची देवाणघेवाण, शंकांचे निरसन आणि समन्वय साधण्याची प्रभावी संधी उपलब्ध झाली.
कार्यक्रमात श्री तेजेंद्र महाजन आणि श्री हिरानंद मूलचंदानी यांनी SIR अभियानातील विविध बाबींवर सविस्तर मार्गदर्शन केले. प्रशिक्षणादरम्यान उपस्थितांच्या शंका दूर करण्यात आल्या तसेच प्रत्यक्ष कामकाजातील विविध मुद्द्यांवर सखोल चर्चा करण्यात आली. या मार्गदर्शनामुळे BLO व त्यांच्या सहाय्यकांना कामकाजाची प्रभावी उजळणी झाली आणि निवडणूक प्रक्रियेतील अनेक तांत्रिक बाबी अधिक स्पष्ट झाल्या.
कार्यक्रमाला उपविभागीय अधिकारी जितेंद्र पाटील, तहसीलदार नीता लबडे, गटविकास अधिकारी डॉ. कुलदीप ठाकरे, गटशिक्षणाधिकारी किशोर वायकोळे, प्रभारी नगराध्यक्षा शैलजा नारखेडे, भाजपा जिल्हाध्यक्ष चंद्रकांत (अण्णा) बाविस्कर, जिल्हा सचिव परिक्षित बऱ्हाटे, तालुकाध्यक्ष गोलू पाटील व प्रशांत पाटील, शहराध्यक्ष किरण कोलते व संदीप सुरवाडे, शिक्षक आघाडीचे जिल्हाध्यक्ष मुकेश मोरे, भाजपा वैद्यकीय आघाडीचे डॉ. नितु पाटील तसेच खाजगी प्राथमिक शिक्षक महासंघाचे जिल्हा सचिव जीवन महाजन यांच्यासह अनेक मान्यवर व्यासपीठावर उपस्थित होते.
भुसावळ तालुक्यातील सर्व नगरसेवक, भाजपा पदाधिकारी, BLO, BLA, आशा वर्कर, अंगणवाडी सेविका, सहाय्यक शिक्षक, निवडणूक शाखेतील कर्मचारी तसेच संबंधित सर्व घटकांची मोठ्या संख्येने उपस्थिती लाभली.
कार्यक्रमाच्या शेवटी मा. ना. संजयजी सावकारे यांनी उपस्थितांसोबत स्नेहभोजनाचा आनंद घेतला. प्रत्यक्ष क्षेत्रात काम करणाऱ्या कर्मचाऱ्यांच्या भावना समजून घेऊन त्यांच्यासाठी समन्वय, प्रशिक्षण आणि समस्या निराकरणाचा असा उपक्रम राबविल्याबद्दल उपस्थितांनी समाधान व्यक्त केले. SIR अभियान अधिक प्रभावी, पारदर्शक आणि लोकाभिमुख करण्याच्या दृष्टीने हा मेळावा निश्चितच महत्त्वाचा टप्पा ठरल्याची भावना उपस्थितांनी व्यक्त केली.यावेळी कार्यक्रमाची प्रस्तावना डॉ. नितु पाटील तर आभार प्रदर्शन जीवन महाजन यांनी केले.सूत्रसंचालन संदीप सुरवाडे यांनी केले.
