जळगाव (प्रतिनिधी) शहरासह जिल्ह्यातील काही खासगी कोविड रुग्णालयांकडून बायोमेडिकल वेस्टच्या नावाखाली रुग्णांची लूट केली जात असून प्रत्येक रुग्णाच्या वैद्यकीय बिलात बायोमेडिकल वेस्टसाठी हजारो रुपये आकारले जात आहेत. या प्रकारासंदर्भात जळगावातील माहिती अधिकार कार्यकर्ते दीपककुमार गुप्ता यांनी जिल्हाधिकारी व राज्याचे मुख्य सचिव तसेच मुख्यमंत्री यांच्याकडे तक्रार केली आहे. तसेच रुग्णांची होणारी लूट थांबवण्याची मागणीही त्यांनी केली आहे.
बायोमेडिकल वेस्टचे व्यवस्थापन करण्याची जबाबदारी ही संबंधित रुग्णालयासह, ते रुग्णालय ज्या स्थानिक स्वराज्य संस्थेच्या अखत्यारीत येते, त्याची असते. खासगी कोविड रुग्णालयांकडून सध्या बायोमेडिकल वेस्टच्या नावाखाली रुग्णांची मोठ्या प्रमाणावर लूट केली जात आहे. बायोमेडिकल वेस्ट संदर्भात खासगी रुग्णालयांचे शुल्क निश्चित करताना जिल्हा प्रशासनाने, प्रत्येक रुग्णाकडून ५०० ते ६०० रुपये घेण्याचे निश्चित केले आहे. मात्र, खासगी रुग्णालये रुग्णांची सर्रास लूट करत आहेत. रुग्णांकडून ५०० ते ६०० रुपये प्रतिदिन बायोमेडिकल वेस्टसाठी शुल्क आकारले जात आहे. त्यामुळे रुग्णाला डिस्चार्ज मिळेपर्यंत त्याच्या बिलात ५ हजार रुपयांपासून १५ ते २० हजारापर्यंतचा अतिरिक्त बोजा पडत आहे, असे तक्रारदार दीपककुमार गुप्ता यांचे म्हणणे आहे.
कोरोनाबाधित रुग्णांची आर्थिक लूट होऊ नये, यासाठी राज्य शासनाने कोरोनाच्या उपचाराचे शुल्क निश्चित केले आहे. यात रुग्णांच्या बेडसह विविध चाचण्यांचे दर निश्चित केले आहेत. रुग्णांच्या बेडसाठी जे शुल्क आकारले जाते. त्यातच बायोमेडिकल वेस्टच्या शुल्काचा समावेश असावा. जेणेकरून रुग्णांची आर्थिक लूट होणार नाही, अशी मागणीही दीपककुमार गुप्ता यांनी केली आहे.
