नंदुरबार (वृत्तसंस्था) धुळे-सुरत राष्ट्रीय महामार्गावरील कोंडाईबारी घाटातील महामार्ग पोलीस मदत केंद्र चौकीजवळ ट्रक, मोटरसायकल व ट्रॅक्टरचा तिहेरी अपघात घडला. यात ट्रकने दुचाकीवरील तिघांना सुमारे १०० मीटरपर्यंत फरफटत नेल्याने तिघांचा दुर्दैवी मृत्यू झाला आहे. यामध्ये पती, पत्नीसह एका महिलेचा समावेश असून तिघे मयत एकाच कुटूंबातील आहेत. दिनेश शिवलाल कोकणी (वय ३५) व अनिता दिनेश कोकणी (वय ३०) या दांपत्यासह निर्मला उमेश कोकणी (वय ३०, तिघे रा. वाटवी, खांडबारा, ता. नवापूर), अशी मयातांची नावे आहेत.
धुळे-सुरत राष्ट्रीय महामार्गावरील कोंडाईबारी घाटातील महामार्ग पोलीस मदत केंद्र चौकीजवळ सायंकाळी पाच वाजेच्या सुमारास धुळेकडून सुरतकडे जाणाऱ्या ट्रकचा कोंडाईबारी घाटातून जात असतांना अचानक ब्रेक फेल झाला. यामुळे सदर ट्रकने पुढे चालणाऱ्या ट्रॅक्टरला व दुचाकीलाधडक दिली. या अपघातात ट्रॅक्टर बाजूला फेकले गेले. मात्र, ट्रकने दुचाकीला सुमारे १०० मीटरपर्यंत फरफटत नेले. यामुळे दुचाकीवरील दिनेश कोकणी, अनिता कोकणी या दांपत्यासह चुलत बहिण निर्मला कोकणी असे तिघे जागीच ठार झाले. तर ट्रॅक्टर चालक प्रकाश सुभाष कोकणी (रा. जामखेल, ता. साक्री) हा जखमी झाला असून त्याच्या डोक्याला मार लागला आहे. या भीषण अपघातामुळे कोंडाईबारी घाटात घटनास्थळी रक्ताचा सडा पडला होता. दुचाकीवरील तिघे एकाच कुटूंबातील आहेत. एका दैनिकाने तिघं जण देवीच्या दर्शनाला जात असल्याचे म्हटले आहे तर एका दैनिकात तिघं जण शेतातून परत येत असल्याचे म्हटले आहे.
दरम्यान, घटनास्थळी महामार्ग वाहतूक मदत केंद्राचे सहाय्यक पोलीस उपनिरीक्षक सुशांत वळवी, पोहेकॉ. किरण धनगर, संजय माळी, पोलीस नाईक हेमकांत कुमावत, पोलीस नाईक भूषण बागुल, राकेश भामरे, तसेच विसरवाडी पोलीस ठाण्याचे पोकॉ. विश्वनाथ नाईक, मनिंदर नाईक, प्रकाश गावित यांनी घटनास्थळी धाव घेत अपघातग्रस्त वाहनाला रस्त्याच्या बाजूला करीत वाहतूक सुरळीत केली.
