पारोळा (प्रतिनीधी) सध्या राज्यात शिवसेनेच्या बंडखोर आमदारांविरुद्ध राज्यभरात शिवसैनिकांच्या आक्रोश पहायला मिळत आहे. यातून काही जिल्ह्यात आमदारांच्या कार्यालयावर हल्लाबोल केला असल्याने कायदा व सुव्यवस्था अबाधित राहण्यासाठी पारोळा येथील आमदार चिमणराव पाटील यांच्या बंगल्यावर राज्य पोलिसांनी बंदोबस्त तैनात केला आहे.
जळगाव जिल्‍ह्यातील चोपडा मतदार संघातील आमदार लता सोनवणे या देखील एकनाथ शिंदे यांच्या गटात सहभागी झाल्‍या आहेत. अनेक ठिकाणी बंडखोर आमदारांच्या कार्यालयाबाहेर शिवसैनिकांनी तोडफोड केली आहे. त्याच पार्श्वभूमीवर पोलिसांनी देखील ठिकाणी बंदोबस्त वाढवला आहे. या पार्श्वभूमीवर पारोळा येथे आमदार चिमणराव पाटील यांच्या बंगल्यावर पोलीसांनी कडक पहारा लावला आहे. शहरात कायदा व सुव्यवस्था शांततेत असून कोणताही अनुचित प्रकार घडला नसल्याचे सूत्रांकडून सांगण्यात येत आहे.
दरम्यान सकाळी पाच व रात्री पाच अशी एकूण दहा पोलीस कर्मचारी यांचा बंदोबस्त तैनात करण्यात आला. शिवसेनेच्या आमदारांनी बंडखोरी केल्‍याने संतप्‍त शिवसैनिकांकडून तोडफोड केली जात आहे. यामुळे सुरक्षा म्हणून आमदार लता सोनवणे यांच्या जळगावातील बंगल्‍यावरही पोलिस सुरक्षा वाढविण्यात आली आहे.
