जळगाव (प्रतिनिधी) राष्ट्रीय महामार्गावर जळगावच्या खोटेनगर स्टॉपजवळ धावत्या कारने अचानक पेट घेतला. ही घटना शनिवारी रात्री घडली असून यात सरपंच साळूंखे यांच्यासह त्यांचे सुदैवाने कुटूंबीय बचावले. अन्यथा मोठा अनर्थ घडला असता.
मारवड येथील सरपंच उमेश साळुंखे हे नातेवाईकांसह कार क्रमांक (एम.एच.१९ सी.एफ ६३५५) ने जळगावात आले होते. जळगावातून पुन्हा गावी मारवडकडे निघाले होते. राष्ट्रीय महामार्गाने जात असतांना खोटेनगर स्टॉपजवळ कारच्या समोरील बोनेटमधुन अचानक धुर निघून आग निघू लागली. वेळीच प्रकार लक्षात आल्याने उमेश साळुंखे प्रसंगावधान राखत तत्काळ कार रस्त्यालगत थांबवून सर्वांना कारच्या बाहेर काढले. कारपासून सर्व दुर जाताच कारच्या आतही भडका उडाला. कारमध्ये सरपंच उमेश साळुंखे यांच्यासह कुटूंबातील दोन महिला, एक पुरूष व तीन लहान मुले प्रवास करीत होते.
