मुंबई (वृत्तसंस्था) राष्ट्रवादीचे अध्यक्ष शरद पवार यांना पोटदुखीच्या त्रासामुळे मुंबईतील ब्रीच कँडी रुग्णालयात दाखल करण्यात आले होते. तेथे त्यांच्यावर एण्डोस्कोपी करण्यात आली. मिळालेल्या माहितीनुसार पवार यांच्यावरील ही शस्त्रक्रिया पूर्ण झाली असून यांची प्रकृती सध्या स्थिर आहे. लवकरच ते रिकव्हर होतील. तसेच पुढील काही दिवसांत पवार यांच्या गॉल ब्लॅडरवर सुद्धा शस्त्रक्रिया केली जाणार आहे.
मंगळवारी पोटदुखी बळावल्यामुळे राष्ट्रवादीचे सर्वेसर्वा शरद पवार यांना तातडीने रग्णालयात दाखल करण्यात आले होते. ते रुग्णालयात ३१ तारखेला दाखल होणे अपेक्षित होते. पण, दुखणे अधिक जाणवू लागल्यामुळे त्यांना एक दिवस आधीच मुंबईतील ब्रीच कँडी रुग्णालयात दाखल व्हावे लागल्यानंतर त्यांच्यावर मंगळवारीच शस्त्रक्रियाही करण्यात आली. मंगळवारी (३० मार्च) उशिरा रात्री पित्ताशयामध्ये अडकलेला मोठा खडा बाहेर काढण्यात आला. एन्डोस्कोपीद्वारे ही शस्त्रक्रिया पार पडली.
काय म्हणाले डॉक्टर ?
या शस्त्रक्रियेमुळे शरद पवारांना पोटदुखीपासून आराम मिळणार आहे. मात्र, शरद पवारांच्या गॉल ब्लॅडरमध्ये छोटे-छोटे खडे असल्याने काही दिवसात त्यांचे गॉल ब्लॅडरही काढण्यात येणार आहे. यासंदर्भात देखील डॉक्टर निर्णय घेणार आहेत. दरम्यान, गॉल ब्लॅडर जरी शस्रक्रिया करुन काढण्यात येणार असले तरी हा अवयव काढल्यानंतर शरद पवारांचे काहीही नुकसान होणार नाही, अशी माहिती शरद पवारांवर उपचार करणारे डॉ. मायदेव यांनी दिली आहे.
शरद पवारांच्या पित्तनलिकेच्या मुखाशी एक मोठा खडा अडकून बसला होता. ज्यामुळे त्यांना त्रास होत होता. त्यामुळे उद्या शस्त्रक्रिया करणं योग्य नव्हतं. त्यामुळे लगेच काही चाचण्या केल्यानंतर पित्तशयातील तो खडा दुर्बिणीद्वारे काढण्यात आला. या शस्त्रक्रियेला अर्धा तास लागला, अशी माहिती डॉक्टर मायदेव यांनी दिली. दरम्यान, या शस्त्रक्रियेद्वारे त्यांच्या यकृतावरील ताण कमी होणार आहे. त्याचसोबत त्यांना थोडी काविळ देखील झाली होती, ती देखील कमी होण्यास मदत होईल असं देखील ते म्हणालेत.
दरम्यान, शरद पवारांच्या पित्ताशयात छोटे छोटे खडे तयार झाल्याने शस्रक्रिया करत त्यांचे पित्ताशय काढण्यात येणार आहे. यासंदर्भातील शस्रक्रिया कधी करायची हे नंतर ठरवलं जाणार आहे. शरद पवारांना त्यांची प्रकृती बघून डिस्चार्ज देण्यात येणार आहे. दोन ते तीन दिवसात त्यांना डिस्चार्ज मिळण्याची शक्यता आहे. सध्या शरद पवार यांची प्रकृती स्थिर असून ते डॉक्टरांच्या निगराणी खाली आहेत. राष्ट्रवादीचे आमदार रोहित पवार यांनीही ट्विट करत शरद पवारांवर शस्त्रक्रिया पुर्ण झाल्याचे सांगितले आहे. तसेच, त्यांची प्रकृती ठिक असून ज्या डॉक्टरांनी त्यांच्यावर उपचार केले त्यांचे आभारही त्यांनी मानले आहेत.
