जळगाव (प्रतिनिधी) दुसऱ्या पोलीस ठाण्याच्या हद्दीत जावून कट्टा बाळगणाऱ्या तरुणाकडे पाच लाखांची मागणी केली. परंतु ती पुर्ण न झाल्याने तरुणाच्या काळातील बाळी काढणाऱ्या अमळनेर पोलिस ठाण्याचे हवालदार लक्ष्मण शिंगाणे यांना निलंबित करण्यात आले. त्यांची प्राथमिक चौकशी सुरू झाली आहे. याच प्रकरणातील महामार्ग पोलिस चौकीचे कर्मचारी रितेश चौधरी यांचा अहवाल संबंधितांना पाठवण्यात आला असून त्यांच्यावर कारवाईची टांगती तलवार आहे.
अमळनेर पोलिस ठाण्याचे पोलिस हवालदार लक्ष्णम शिंगाणे व पाळधी महामार्ग पोलिस चौकीचे कर्मचारी रितेश चौधरी हे दोघं कर्मचारी चोपडा तालुक्यातील हातेड येथे आपल्या दोन पंटरांसह दि. १० जानेवारी रोजी गेले होते. याठिकाणी शुभम प्रकाश सूर्यवंशी (रा. हातकणंगले, ता. कोल्हापूर) या तरुणाला अडवून त्याची तपासणी केली असता, त्याच्याकडे गावठी कट्टा मिळून आला होता. त्यानंतर पोलिसांनी या तरुणाकडे पाच लाख रुपयांची मागणी केली होती. पैशाची मागणी पूर्ण न झाल्याने सूर्यवंशीच्या कानातील सोन्याची बाळी या पोलिसांनी काढून घेतली होती.
या संपूर्ण प्रकाराचा अहवाल पोलिस अधीक्षक एम. राजकुमार यांच्याकडे सादर करण्यात आल्यानंतर शिंगाणे यांची विभागीय चौकशी सुरू करण्यात आली व कट्टा बाळगणाऱ्या सूर्यवंशी याच्या कानातून काढून घेतलेली बाळी शिंगाणे यांनी चोपडा ग्रामीण पोलिसांच्या ताब्यात दिली होती.
या प्रकरणात पोहेकॉ लक्ष्मण शिंगाणे यांना निलंबित करण्यात आले असून याबाबतचे आदेश पोलीस अधीक्षक एम्. राजकुमार यांनी काढले आहेत. तसेच त्यांची अमळनेर उपविभागीय पोलिस अधिकाऱ्यांमार्फत चौकशीदेखील सुरू करण्यात आली आहे. दरम्यान, महामार्ग पोलिस चौकीचे कर्मचारी रितेश चौधरी यांचा अहवाल संबंधितांना पाठवण्यात आला आहे.
