इस्लामाबाद (वृत्तसंस्था) पाकिस्तानच्या अत्याचारांविरोधात आवाज उठवणाऱ्या सामाजिक कार्यकर्त्या करीमा बलोच यांचा मृतदेह कॅनडामध्ये सापडला. करीमा बलोच या भारताचे पंतप्रधान नरेंद्र मोदी यांना भाऊ मानत होत्या. कॅनडियन पत्रकार तारेक फतेह यांनी बलोच यांच्यासोबत घातपात झाल्याचा संशय व्यक्त केला आहे.
करीमा बलोच कॅनडात वास्तव्याला होत्या. गेल्या तीन दिवसांपासून त्या बेपत्ता होत्या. कॅनडाच्या शरणार्थी असलेल्या बलोच यांचे नाव २०१६ मध्ये जगातील सर्वात प्रभावशाली १०० महिलांच्या यादीत समाविष्ट करण्यात आले होते. पाकिस्तानने केलेल्या अत्यचारांचा पाढा संयुक्त राष्ट्रासमोर मांडणाऱ्या अग्रणी महिलांपैकी त्या एक होत्या. पाकिस्तानमधील बलुचिस्तान प्रांतामध्ये पाकिस्तानी लष्कर आणि तेथील स्थानिक प्रशासनाकडून होणाऱ्या अत्याचारांविरोधात आवाज उठवणाऱ्या सामाजिक कार्यकर्त्या करिमा बलूच यांचं निधन झालं आहे. बलुचिस्तान पोस्टने दिलेल्या वृत्तानुसार करिमा यांचा मृतदेह कॅनडामधील टोरांटो येथे सापडला आहे. करिमा यांनी कॅनडामध्ये आश्रय घेतला होता. २०१६ साली बीबीसीच्या १०० सर्वाधिक प्रभावशाली स्त्रीयांच्या यादीमध्ये करिमा यांचा समावेश होता. रविवारी करिमा बेपत्ता झाल्या होत्या. दुपारी तीनच्या सुमारास त्या शेवटच्या दिसल्या होत्या. टोरांटो पोलिसांनी करिमा यांचा शोध घेण्यासाठी स्थानिकांची मदत घेत करिमा यांच्यासंदर्भात काही माहिती असल्यास कळवावी असं आवाहन केलं होतं. मात्र आता करिमा यांचा मृतदेह सापडल्याची माहिती त्यांच्या कुटुंबियांनी दिली आहे. करिमा या बलुचिस्तानमध्ये अंत्यंत लोकप्रिय होत्या. महिलांसाठी लढा देणाऱ्या समाजिक कार्यकर्ता म्हणून त्यांनी आपली वेगळी ओळख निर्माण केली होती. स्वित्झर्लंडमधील संयुक्त राष्ट्रांच्या चर्चेदरम्यान करिमा यांनी बलुचिस्तान हा विषय उपस्थित केला होता. मे २०१९ रोजी दिलेल्या एका मुलाखतीमध्ये पाकिस्तान सरकार बलुचिस्तानमधील नैसर्गिक साधनसंपत्तीचा वापर करत असले तरी तेथील लोकांना फारशी किंमत देत नसल्याचे करिमा यांनी म्हटलं होतं. करिमा यांच्या मृत्यूसंदर्भात शंका उपस्थित केली जात असल्याचे बलुचिस्तान पोस्टने म्हटले आहे.
बलुचिस्तानमधील स्थानिकांच्या हक्कासाठी लढणाऱ्या आणि या लढ्यात सक्रीय सहभाग असणाऱ्या व्यक्तीचा अशाप्रकारे संक्षयितरित्या मृत्यू होण्याचे हे काही पहिलेच प्रकरण नाही. यापूर्वीही बलुचिस्तानमधील पत्रकार साजिद हुसैन यांचा अशाचप्रकारे स्वीडनमध्ये मृत्यू झाला होता. ते उपासाला येथून दोन मार्चपासून बेपत्ता होते आणि नंतर थेट त्यांचा मृतदेहच हाती लागला होता.
