जळगाव (प्रतिनिधी) जळगावातील शानबाग विद्यालयाने फी अभावी विद्यार्थ्यांचा निकाल रोखून धरल्याप्रकरणी शिक्षणाधिकारी बी.जे.पाटील यांनी शानबाग विद्यालयाला सक्त ताकीद देत आपल्या जयंत प्र. टेंबरे आणि हर्षल सुधाकर घोलाने या दोघां शिक्षकांवर कारवाई करण्याचे आदेश दिले आहेत. एवढेच नव्हे तर दोघांवर काय कारवाई केली?, याचा अहवाल उलट टपाली कार्यालयास सादर करण्याचे देखील आदेशात म्हटले आहे.
काय होती नेमकी तक्रार
कोरोनामुळे वर्षभर ऑनलाईन शिक्षणात सरले असून या शैक्षणिक सत्राचा निकाला जाहीर करण्याच्या सूचना शिक्षण विभागाकडून नसतानाही जळगावातील शानबाग विद्यालयाने ऑफलाईन निकाल जाहीर करुन काही विद्यार्थ्यांना निकालपत्रही वाटप केले होते. तर ज्या विद्यार्थ्यांकडे फी बाकी आहे. त्यांचे निकाल देखील रोखण्यात येत असल्याचा धक्कादायक प्रकार घडला होता. याबाबत सामाजिक कार्यकर्ते तथा एका विद्यार्थ्याचे पालक रवींद्र शिंदे यांनी गटशिक्षणाधिकारी सतीश चौधरी यांच्याकडे भ्रमणध्वनीवरुन तक्रार केली होती. तक्रार दाखल झाल्यानंतर शानबाग विद्यालयाने आपला खुलासा सादर केला होता. तर खुलाशाविरुद्ध मुख्य तक्रारदार रवींद्र शिंदे यांनीही आपले म्हणणे लेखी स्वरूपात गट शिक्षणाधिकार्‍यांकडे सादर केले होते. गटशिक्षणाधिकारी सतीश चौधरी यांनी याप्रकरणी शाळेतील विविध लोकांचे जाब जबाब नोंदवून घेतल्यानंतर चौकशीअंती शालेय प्रशासन हे दोषी असल्याचे दिसून येत आहे, असा अहवाल दिला होता. त्यानुसार आता शिक्षण अधिकारी बी.जे.पाटील यांनी शानबाग विद्यालयाला सक्त ताकीद देत आपल्या जयंत प्र. टेंबरे आणि हर्षल सुधाकर घोलाने या दोघं शिक्षक कर्मचारींवर कारवाई करण्याचे आदेश दिले आहेत. तसेच अहवाल उलट टपाली कार्यालयास सादर करण्याचे देखील आदेश शिक्षण अधिकाऱ्यांनी दिले आहेत.
शानबाग विद्यालयास सक्त ताकीद
शिक्षण अधिकाऱ्यांनी शानबाग विद्यालयाच्या संचालक मंडळाला पाठवलेल्या पत्रात म्हटले आहे की, उपरोक्त संदर्भिय विषयान्वये आपण आपल्या शाळेतील एका विद्यार्थ्याचा निकाल फि साठी राखून ठेवला व उशिराने संबंधित तक्रारदारास व्हॉटसअँपद्वारे निकाल दिला आहे. तरी सदर चौकशी अंती शालेय प्रशासन दोषी असल्याचे स्वयंस्पष्ट अहवाल गट शिक्षणाधिकारी पंचायत समिती जळगाव यांचेकडुन प्राप्त झाला आहे. तरी याबाबत आपणास सक्त ताकीद देण्यात येत आहे. या पुढे भविष्यात अशी बाबत पुन्हा घडणार नाही. याची गांभीर्याने नोंद घ्यावी.
पुढील कारवाईसाठी शिक्षण उपसंचालकांना पत्र
कै. श्रीमती ब.गो. शानभाग विद्यालय सावखेडा ता.जि.जळगाव या शाळेतील विद्यार्थ्यांचे निकाल फि साठी राखून ठेवून उशिराने दिल्या बाबतच्या रविंद्र हिम्मतराव शिंदे यांच्या तक्रारीची चौकशीचा अहवाल गट शिक्षणाधिकारी पंचायत समिती जळगाव यांनी या कार्यालयास सादर केला आहे. चौकशीच्या अहवालात रविंद्र हिम्मतराव शिंदे यांनी सादर केलेली तक्रार व त्या संदर्भात शाळेच्या मुख्याध्यापीका, उप-मुख्याध्यापक व वर्ग शिक्षक यांनी सादर केलेला लेखी जबाब यावरुन शालेय प्रशासन दोषी असल्याचे स्पष्ट मत गट शिक्षणाधिकारी पंचायत समिती जळगाव यांनी नमूद केलेले आहे. तसेच संबंधीत शाळेस भविष्यात अशी बाब घडणार नाही अशी सक्त ताकीद देण्यात आली आहे. तरी उपरोक्त शाळेवर पुढील कार्यवाहीस्तव व आदेशार्थ सविनय सादर, असे पत्र शिक्षण अधिकाऱ्यांनी शिक्षण उपसंचालकांना पाठवले आहे.
उपमुख्याध्यापक श्री. टेंबरे सर यांनी प्रसार माध्यमांना प्रतिक्रिया दिली होती की, रवींद्र शिंदे यांचे आरोप तथ्यहीन आहेत. परंतु शिक्षणाधिकाऱ्यांनी संस्थाचालकांना सांगितले आहे की, उपमुख्याध्यापक टेंबरे व वर्ग शिक्षकावर आपल्या स्तरावरून कारवाई करा. तसेच त्याचा अहवाल कार्यालयास सादर करा, यावरून सामाजिक जाणिवेतून चालणारी संस्था आता सामाजिक बांधिलकी ठेवून या दोघं शिक्षकांवर कारवाई करेल, अशी अपेक्षा करतो.
– तक्रारदार रवींद्र हिम्मतराव शिंदे
