नंदुरबार (वृत्तसंस्था) जिल्हा परिषदेच्या लघु पाटबंधारे विभागातंर्गत शहादा तालुक्यात करण्यात आलेल्या कामांचे बिल काढण्याच्या मोबदल्यात ७५ हजार रुपये घेवूनही आणखी २० हजारांच्या लाचेची मागणी लघु पाटबंधारे विभागातील कनिष्ठ अभियंत्याने केली. यात तडजोडीअंती १९ हजार ५०० रुपयांची लाच स्विकारत असतांना संशयित कनिष्ठ अभियंत्यास लाचलुचपत प्रतिबंधक विभागाच्या पथकाने रंगेहात पकडले आहे. याप्रकरणी रात्री उशिरापर्यंत कारवाई सुरु होती.
शहादा तालुक्यातील तक्रारदार यांनी सन २०२२ मध्ये ऑक्टोबर २०२२ ते डिसेंबर २०२२ या कालावधीत लघु पाटबंधारे विभाग, जिल्हा परिषद नंदुरबार अंतर्गत तीन कामे पूर्ण केली होती. सदर तिन्ही कामांच्या बिलाची रक्कम काढून देण्याच्या मोबदल्यात जि.प.मधील लघु पाटबंधारे विभागाचे कनिष्ठ अभियंता दिनेश केशवराव पाटील यांनी ९५ हजार रुपयांची मागणी केली होती. यापैकी वेळोवेळी ७५ हजार रुपये इतकी रक्कम यापूर्वीच दिनेश पाटील यांनी तक्रारदाराकडून घेतली होती. मात्र उर्वरित २० हजार रुपयांची रक्कम देण्यात यावी. यासाठी ठेकेदाराकडे तगादा लावला होता.
दरम्यान, तडजोडीअंती १९ हजार ५०० रुपयांची रक्कम देण्याचे ठरले. त्यानुसार काल जिल्हा परिषदेच्या मुख्य प्रवेशद्वाराजवळ कनिष्ठ अभियंता दिनेश पाटील तक्रारदाराकडून १९ हजार ५०० रुपयांची लाच स्वीकारत असताना लाचलुचपत प्रतिबंधक विभागाच्या पथकाने रंगेहाथ पकडले. सदरची कारवाई सापळा अधिकारी पोलिस उपअधीक्षक राकेश चौधरी, सापळा पथकातील अधिकारी पोलिस निरीक्षक माधवी वाघ, पोहेकॉ. विलास पाटील, ज्योती पाटील, अमोल मराठे, देवराम गावित, पोना. संदीप नावाडेकर, मनोज अहिरे यांच्या पथकाने केली.