जळगाव (प्रतिनिधी) – गर्दीचा फायदा घेत बसमध्ये चढतांना युमनाबाई रमन पाटील (रा. वर्डी, ता. चोपडा) यांच्या गळ्यातून ९ ग्रॅम वजनाची सोन्याचे मणी असलेले मंगळसूत्र चोरट्यांनी लांबवले. ही घटना दि. २२ मे रोजी दुपारी २ वाजेच्या सुमारास नवीन बस स्थानक परिसरात घडली. याप्रकरणी जिल्हापेठ पोलीस ठाण्यात गुन्हा दाखल करण्यात आला आहे.
चोपडा तालुक्यातील वर्डी गावात राहणारे रमन कौतिक पाटील (वय ७०) हे पत्नी यमुनाबाई पाटील यांच्यासह दि. २२ मे रोजी गावात घरा शेजारी राहणारे कैलास पाटील यांना हॉस्पिटलमध्ये पाहण्यासाठी जळगावला आले होते. त्यांना भेटून झाल्यानंतर ते घरी जाण्यासाठी नवीन बस स्थानकावर आले. यावेळी चोपडा जाण्याकरीता बस लागलेली असतांना दोघ वृद्ध दाम्पत्य बसमध्ये चढले. यावेळी गर्दीचा फायदा घेत चोरट्यांनी यमुनाबाई पाटील यांच्या गळ्यातील सोन्याचे मणी आणि पदक असलेले मंगळसूत्र चोरुन नेले.
शोध घेवूनही मिळून आले नाही मंगळसूत्र बसमध्ये चढल्यानंतर यमुनाबाई यांना गळ्यातील सोन्याचे मंगळसूत्र दिसून आले नाही. त्यांनी ही बाब त्यांच्या पतीला सांगितल्यानंतर त्यांनी आजूबाजूला शोध घेतला, मात्र तरी देखील मिळून न आल्याने अखेर त्यांनी जिल्हापेठ पोलिसात धाव घेत तक्रार दिली. त्यानुसार अज्ञात चोरट्यांविरुद्ध गुन्हा दाखल करण्यात आला आहे.
