नाशिक (वृत्तसंस्था) भावाभावांमध्ये वडिलोपार्जित शेतजमिनीची वाटणी झाल्यानंतर त्यासंबंधी महसूल अभिलेखावर नावे लावण्याच्या मोबदल्यात २० हजार रुपयांची लाच स्वीकारताना तलाठ्याला शुक्रवारी रंगेहात अटक करण्यात आली. चंपालाल सुरेश चव्हाण, असे संशयित आरोपी तलाठ्याचे नाव आहे. लाचलुचपत प्रतिबंधक विभागाच्या पथकाने ही कारवाई केली.
तक्रारदार यांच्या वडिलांच्या नावे असलेल्या शेतजमिनीची वाटणी झाल्यानंतर महसूल अभिलेखावर त्यासंबंधी नावे लावण्यासाठी कागदपत्रे तलाठी चंपालाल सुरेश चव्हाण यांच्याकडे देण्यात आली होती. चव्हाण यांनी तक्रारदाराकडे नावे लावण्याच्या मोबदल्यात २० हजार रुपयांची लाच मागितली. परंतू तक्रारदाराची लाच देण्याची इच्छा नसल्यामुळे त्यांनी लाचलुचपत प्रतिबंधक विभागाकडे तक्रार दिली. लाच मागितल्याची खात्री झाल्यानंतर एसीबीच्या पथकाने सापळा रचला असता तलाठी चंपालाल चव्हाण यास कऱ्हे, ता. सटाणा येथे २० हजार रुपयांची लाच स्वीकारताना रंगेहाथ पकडण्यात आले.
