मुंबई (वृत्तसंस्था) टाटा मोटर्सने ऑटोमोबाईल बाजारात मोठा गेम खेळला आहे. इलेक्ट्रीक वाहनांना पेट्रोल, डिझेल वाहनांपासून वेगळे करत नवीन कंपनी काढली आहे. टाटा मोटर्सने इलेक्ट्रिक वाहनांच्या विकासासाठी आणि उत्पादनासाठी नवीन सहाय्यक कंपनीमध्ये ७०० कोटी रुपयांची गुंतवणूक केलीये. कंपनीने एक नवीन विभाग तयार केला आहे, ज्याला टाटा पॅसेंजर इलेक्ट्रिक मोबिलिटी लिमिटेड असे नाव देण्यात आलंय.
टाटाच्या इलेक्ट्रीक वाहनांना मोठा प्रतिसाद
टाटाच्या इलेक्ट्रीक वाहनांना मोठा प्रतिसाद मिळाला आहे. टाटा नेक्सॉन ही फाईव्ह स्टार सेफ्टीसह इलेक्ट्रीक मध्येही मिळत आहे. शिवाय चांगली रेंजही देते. टाटाने आणखी एक कार टिग़ॉर इलेक्ट्रीकमध्ये लॉच केली आहे. आता आणखी काही मॉडेल्स इलेक्ट्रीकमध्ये येणार आहेत. यामुळे टाटाने इलेक्ट्रीक वाहने वेगळ्या कंपनीकडे असावीत असा निर्णय घेतला आहे. ही टाटाच्याच मालकीची उप कंपनी असणार आहे. टाटाने या मोठ्या निर्णयाची बुधवारी घोषणा केली. टाटाच्या संपूर्ण मालकीच्या नव्या कंपनीचे नाव Tata Passenger Electric Mobility Limited (TPEML) (टाटा पॅसेंजर इलेक्ट्रिक मोबिलिटी लिमिटेड) (टीपीईएमएल) असे आहे. टाटने सांगितले की, मंत्रालयाने याला मंजुरी दिली असून २१ डिसेंबर, २०२१ मध्ये याचे प्रमाणपत्र देखील जारी केले आहे.
काय आहे टाटा मोटर्सचे नियोजन ?
टाटा मोटर्सने बीएसई फाइलिंगमध्ये म्हटले आहे की, “टीपीईएमएल इलेक्ट्रिक वाहने/इलेक्ट्रिक मोबिलिटी, सर्व प्रकारच्या हायब्रीड इलेक्ट्रिक वाहनांचे उत्पादन, डिझाइन, विकास किंवा वीज, बॅटरी, सौर उर्जा, किंवा इतर कोणत्याही विद्युत उपकरणांद्वारे चालणारी वाहने, इंजिन, मोटर्स, भाग, घटक, उपकरणे आणि संबंधित उपकरणे, तसेच असेंब्ली, फॅब्रिकेशन, उत्पादन विक्री, स्थापनेसाठी आणि विक्रीनंतरचे उपक्रम आदी या कंपनीच्या अंतर्गत येणार आहेत.”
