नागपूर (वृत्तसंस्था) सदर उड्डाणपुलावरील हल्दीराम टी-पॉइंटजवळ भरधाव कारने एका दुचाकीला दिलेल्या जोरदार धडकेत दोन मित्रांचा दुर्दैवी मृत्यू झाला. ही घटना सोमवारी दुपारच्या सुमारास घडली. मृतकांमध्ये पवन ईश्वर झाडे (वय ४०) आणि अनुत्तर गणपत शंभरकर (वय ४२ ) यांचा समावेश आहे. पोलिसांनी कारचालक भोलेनगर, हुडकेश्वर येथील रहिवासी अमोल अरविंद गडवे (३८) याला अटक केली आहे.
अनुत्तर शंभरकर हे मुख्याध्यापक आणि लिपिक पवन झाडे हे दोघे मित्र सोमवार,११ सप्टेंबर रोजी ५.३० वाजताच्या सुमारास त्यांच्या दुचाकीने सदर उड्डाणपुलावरून काटोल रोडच्या दिशेने जात होते. याचदरम्यान मानकापूरकडून सदरकडे येणाऱ्या कारचा चालक अमोल गडवे याने त्याची कार भरधाव चुकीच्या दिशेने चालवून त्यांच्या दुचाकीला जोरदार धडक दिली. या अपघातात भरधाव कारने दुचाकीला जवळपास १०० मीटरपर्यंत फरफटत नेले. त्यानंतर पुलाच्या कठड्याला धडक दिली. कार कठड्याला धडकल्याने पवन झाडे याचा चिरडून जागीच मृत्यू झाला. तर दुचाकीवर मागे बसलेला अनुत्तर शंभरकर हा ८० फूट उंच उड्डाणपुलावरून खाली पडून गंभीर जखमी झाला. त्याला रुग्णालयात दाखल करण्यात आले असता डॉक्टरांनी तपासून मृत घोषित केले.
या प्रकरणी पोलिसांनी गुन्हा दाखल करत आरोपी कारचालकाला अटक केली आहे. कारची धडक इतकी जोरदार होती की, दोघेही दुचाकीवरून उसळून फेकल्या गेले. यात कारने पवनला घास नेले तर अनुत्तर हा पुलावरून खाली फेकल्या गेला. दोन्ही वाहनांच्या धडकेनंतर झालेल्या आवाजामुळे खाली असलेल्या लोकांना उड्डाणपुलावर अपघात झाल्याचा संशय आला. लोकांनी याची माहिती पोलिसांना दिली.
