नवी दिल्ली (वृत्तसंस्था) लडाखमध्ये (Ladakh) एका वाहन अपघातात भारतीय लष्कराच्या (Army) ७ जवानांना आपला जीव गमवावा लागला आहे. इतर सैनिक गंभीर जखमी झाले आहेत. अपघातानंतर लगेचच जवानांना बाहेर काढण्याची मोहिम राबवण्यात आली. जवानांना रुग्णालयातही दाखल करण्यात आले, मात्र या अपघातात सात जवानांचा मृत्यू झाला आणि अनेकांना गंभीर दुखापत झाली.
ही घटना थोईस पासून २५ किलोमीटर अंतरावर घडली. श्योक नदीत लष्कराची बस ५० ते ६० फुट खाली कोसळली. या अपघातात बसमधील सर्व जवान जखमी झाले आहेत. जखमी झालेल्या जवानांना परतापूर येथील रुग्णालयात दाखल करण्यात आले आहे. लेह मधील डॉक्टरांना परतापूरमध्ये पाठवण्यात आले आहे. या अपघातात ७ जवानांचा मृत्यू झाल्याची घोषणा करण्यात आली आहे.
अपघातातील जखमी जवानांच्या मदतीसाठी हवाई दलाशी संपर्क साधण्यात आला. त्यांना उपचारासाठी वेस्टर्न कमांडकडे पाठवले जाऊ शकते. लष्कराची बस कोणत्या कारणांमुळे नदीमध्ये घसरली हे अद्याप स्पष्ट झालेले नाही. या घटनेबाबत लष्कराने अधिकृत माहिती दिलेली नाही. प्राथमिक माहितीनुसार, लष्करांची बस ट्रांजिट कॅम्पमधून सब सेक्टर हनिफच्या पुढे जाण्याच्या दिशेने जात होती, त्याचवेळी हा अपघात झाला.
