कोटा (वृत्तसंस्था) राजस्थानमधील कोटा येथे मोठी दुर्घटना घडली. नवरदेवासह ९ वऱ्हाडींना घेऊन जाणारी भरधाव कार चंबळ नदीत कोसळली (car fell into river). अपघातात सर्वांचा मृत्यू झाला आहे.
अपघाताची माहिती मिळताच पोलीस घटनास्थळी दाखल झाले. मदत आणि बचावकार्य तातडीने सुरू केले. पोलिसांनी मृतदेह ताब्यात घेतले असून ते पोस्टमार्टमसाठी रुग्णालयात पाठवले आहे. तसंच क्रेनच्या सहायाने नदीत पडलेली कार बाहेर काढण्यात आली आहे. ज्या पुलावरून कार नदीत कोसळली तो ब्रिटिशकालीन म्हणजे १०० वर्षे जुना पूल आहे. चंबळ नदीवर नयापुरा भागात हा पूल आहे. भीषण कार अपघातात नवरदेवास ९ जणांचा मृत्यू झाला आहे. नवरदेवाची कार होती. राजस्थानच्या सवाई माधोपूरमधील बरवाडा भागातून ते उज्जैनमध्ये लग्नासाठी निघाले होते, अशी माहिती कोटा पोलिसांनी दिली आहे.
कारवरील नियंत्रण सुटल्याने रात्री उशिरा हा अपघात झाल्याचं सांगण्यात येतंय. अपघाताची माहिती कुणालाही नव्हती. पण कोणीतरी रात्रीच्या कार नदीत कोसळताना बघितलं होतं. यानंतर पोलिसांना माहिती दिली गेली. यानंतर पोलीस घटनास्थळी पोहोचले. कोटा पालिकेचे बचाव पथकही बोलवले गेले. कारमधून ९ जणांचे मृतदेह बाहेर काढण्यात आले आहे. त्यांची नावं आणि पत्ता शोधला जात आहे. कुटुंबीयांना सूचना देण्यासाठी कोटा पोलीस सवाई माधोपूर पोलिसांशी संपर्क करत आहेत, अशी माहिती कोटा पोलीस अधीक्षक केसर सिंह यांनी दिली.
