नंदुरबार (प्रतिनिधी) वडीलोपार्जित शेतातील आंब्याचे झाड तोडून विक्री करण्यास मनाई केल्याच्या रागातून मुलाने कुऱ्हाडीने घाव घालून आईचा निर्घुण खून केल्याची धक्कादायक घटना धडगाव तालुक्यातील कालीबेल येथे घडली आहे. याप्रकरणी धडगाव पोलीस ठाण्यात संशयित मुलाविरुध्द खुनाचा गुन्हा दाखल करण्यात आला असून त्याला पोलिसांनी अटक केली आहे.
पिसीबाई सोमल्या वळवी (वय ७२, रा. कालीबेल ता. धडगाव) यांच्या वडीलोपार्जित शेतात आंब्याची झाडे आहेत. पिसीबाई वळवी यांचा मुलगा संशयित अनिल सोमल्या वळवी (वय ३२) याने गेल्या वर्षी यातील एक आंब्याचे झाड तोडून त्याची विक्री केली होती. आता पुन्हा तो शेतातील दुसरे झाड तोडून त्याची विक्री करणार होता.
यावेळी मात्र, पिसीबाई यांनी झाड तोडण्यास अनिलला विरोध केला. मात्र सावत्र आई वडीलोपार्जित शेतातून आंब्याचे झाड तोडून विक्री करू देत नाही, याचा राग आल्याने गुरुवारी (दि.१६) सायंकाळी ७.३० वाजेच्या सुमारास संशयित अनिलने कुऱ्हाडीने पिसीबाई यांच्या डोक्यावर वार करीत त्यांना जिवेठार केले. याप्रकरणी दौलत सोमल्या वळवी (रा. कालीबेल) यांनी धडगाव पोलीस ठाण्यात दिलेल्या फिर्यादीवरुन संशयित अनिल सोमल्या वळवी याच्याविरुध्द खुनाचा गुन्हा दाखल करण्यात आला असून संशयित अनिल वळवी याला पोलिसांनी अटक केली आहे
