मुंबई (वृत्तसंस्था) पूजा चव्हाण हिच्या मृत्यूवरुन राज्यातील राजकीय वातावरण तापलेले दिसत आहे. भाजप नेत्या चित्रा वाघ या सातत्याने या विषयी आक्रमक भूमिका घेत असल्याचे दिसत आहेत. यावर आता शिवसेना नेते संजय राऊत यांनी भाष्य केले आहे. राज्याचे मुख्यमंत्री हे संवेदनशील आहेत, ते ‘मिस्टर सत्यवादी’ आहेत. त्यामुळे या प्रकरणाचा तपास होणार आणि पूजा चव्हाणला न्याय मिळणारच असं वक्तव्य खासदार संजय राऊत यांनी केलंय.
संजय राऊत म्हणाले की, “पूजा चव्हाण प्रकरणी तपास सुरु आहे. मुख्यमंत्री हे अत्यंत संवेदनशील मनाचे आहेत. ते काही डोळे झाकून बसले नाहीत. मुख्यमंत्री हे कोणावरही अन्याय होऊ देणार नाहीत. त्यांचे राज्यातील प्रत्येक गोष्टीकडे लक्ष असते. या प्रकरणाचा तपास होणार आणि पूजा चव्हाण आणि तिच्या कुटुंबाला न्याय मिळणार. ” चित्रा वाघ यांनी संजय राठोड यांच्या राजीनाम्याची मागणी केली असून आज उद्धव ठाकरे मुख्यमंत्री नसते आणि शिवसेनेच्या पक्षप्रमुखपदी असते तर त्यांनी राठोडांना फाडून खाल्ल असतं असं वक्तव्य केलं आहे. त्यावर बोलताना संजय राऊत म्हणाले की, “चित्रा वाघ या विरोधी पक्षात आहेत. त्यामुळे त्या आंदोलन करत आहेत. त्यांच्याकडे या प्रकरणाची अतिरिक्त माहिती असेल तर त्यांनी ती राज्याचे गृहमंत्री आणि तपास यंत्रणाना द्यावी.”
संजय राऊत हे चित्रा वाघ यांना सल्ला देताना म्हणाले की, “या प्रकरणात न्याय मिळाला नाही तर त्यांनी अशा पत्रकार परिषदा घ्याव्यात. या अशा प्रकरणांचा प्रसिद्धीसाठी कोणीही वापर करु नये.” संजय राठोड यांच्या राजीनाम्यासाठी भाजपच्या वतीनं राज्यभर आंदोलन छेडलं आहे. त्यावर बोलताना खासदार संजय राऊत म्हणाले की, “आंदोलन करु नये अशी भूमिका पंतप्रधान नरेंद्र मोदींची आहे. महाराष्ट्राची परंपरा ही सत्यासाठी, न्यायासाठी लढणारी अशी आहे. त्यामुळे हा प्रश्न चर्चेतून सोडवावा. या प्रकरणी विरोधी पक्षांनी विधानसभेत प्रश्न विचारावेत.”
पूजा चव्हाण आत्महत्या प्रकरणामध्ये वनमंत्री संजय राठोड यांचे नाव आल्यापासून सातत्याने त्यांच्यावर कारवाई करण्याची मागणी होत आहे. विशेषतः भाजपने आक्रमक भूमिका घेतल्याचे पाहायला मिळतेय. राठोड यांच्यावर कारवाईची मागणी केली जात आहे. भाजपच्या महिला उपाध्यक्ष चित्रा वाघ यात आघाडीवर आहेत. आज देखील भाजपकडून ठिकठिकाणी राठोड यांच्याविरोधात निदर्शने करण्यात आली. या संपूर्ण घडामोडींविषयी संजय राऊत म्हणाले की, या प्रकरणाचा तपास सुरू आहे. पूजाच्या कुटुंबियांना न्याय मिळेल.
