नवी दिल्ली (वृत्तसंस्था) कोरोना व्हायरसने देशातचं नाही तर संपूर्ण जगात हाहाकार माजवला आहे. देशात आलेल्या दुसऱ्या लाटेने तर अनेकांचे प्राण घेतले. अशात कोरोना विषाणूच्या उत्पत्तीसंदर्भात सुरू असलेल्या वादात जागतिक आरोग्य संघटनेने कोरोना व्हेरिएन्टचं नाव बदललं आहे. कोरोनाच्या दुसऱ्या लाटेस जबाबदार असलेल्या B.1.617.2 या व्हेरिएन्टचं नाव ‘डेल्टा’ असं ठेवलं आहे. तर B.1.617.1 या व्हेरिएन्टचं नाव ‘कप्पा’ असं ठेवलं आहे.
कोरोनाचे नवीन स्ट्रेन निर्माण झाल्यानंतर त्यांच्या नावावरून वाद सुरू झाले होते. काही दिवसांपूर्वीच डबल म्युटेंशन असलेल्या B.1.617.2 स्ट्रेनचा भारतीय स्ट्रेन असा उल्लेख काढण्याचे आदेश केंद्र सरकारने सोशल मीडियाला दिले होते. तर सिंगापूर सरकारनंही सिंगापूरमध्ये आढळून आलेलं नवीन म्युटेशन भारतातीलच असल्याचं म्हटलं होतं. या सगळ्या वादावर मार्ग काढत जागतिक आरोग्य संघटनेनं विविध देशात आढळून आलेल्या स्ट्रेनला नाव दिली आहेत.
आतापर्यंत भारतात कोरोनाचे दोन स्ट्रेन आढळून आलेल आहेत. त्या दोन्ही स्ट्रेनचंही नाव बदलण्यात आलं आहे. ग्रीक वर्णमालेचा वापर करून आरोग्य संघटनेनं ही नाव निश्चित केली आहेत. यात ऑक्टोबर २०२०मध्ये भारतात आढळून आलेल्या B.1.617.2 या स्ट्रेनला डेल्टा असं नाव देण्यात आलं आहे. तर मागच्याच वर्षी ऑक्टोबरमध्ये पहिल्यांदा आढळून आलेल्या B.1.617.1 या स्ट्रेनला कप्पा असं नाव देण्यात आलं आहे.
ब्रिटन, दक्षिण आफ्रिका, ब्राझील, अमेरिका, भारत या देशात म्युटेशन होऊन कोरोनाचे नवीन स्ट्रेन निर्माण झाले आहेत. या स्ट्रेनचा उल्लेख या देशांच्या नावानेच केला जात होता. ब्रिटनमध्ये सप्टेंबर २०२० मध्ये आढळून आलेल्या B.1.1.7या स्ट्रेनचं नाव अल्फा असं ठेवण्यात आलं आहे. दक्षिण आफ्रिकेत B.1.351 कोरोनाचा स्ट्रेन आढळून आला होता. तो आता बेटा या नावाने ओळखला जाणार आहे. तर ब्राझीलमध्ये या वर्षाच्या सुरूवातीलाच म्हणजे जानेवारीमध्ये आढळून आलेल्या स्ट्रेनला गामा असं नाव देण्यात आलं आहे. अमेरिकेतील स्ट्रेनला एप्सिलॉन, तर फिलीपाईन्समध्ये जानेवारी महिन्यात आढळून आलेल्या कोरोना स्ट्रेनचं नाव थीटा असं ठेवण्यात आलं आहे.
कोरोनाच्या B.1.617 व्हेरिएन्टचे तीन प्रकार आहेत. B.1.617.1, B.1.617.2 आणि B.1.617.3. मिळालेल्या माहितीनुसार वेग-वेगळ्या देशांमध्ये आणि क्षेत्रांमध्ये २५ मे पर्यंत कोरोना व्हायरसच्या B.1.617 स्ट्रेनचे तीन प्रकार आढळले आहेत.
