यावल (प्रतिनिधी) रात्री नळाला पाणी आल्यानंतर धावपळीत पाण्याची इलेक्ट्रिक मोटारची पीन लावतांना शॉक लागल्याने एकाच मृत्यू झाल्याची दुर्दैवी घटना रविवारी रात्री तालुक्यातील शिरसाड गावी घडली. गलीराम रामदास धनगर (वय 45), असे मयत व्यक्तीचे नाव आहे.
यावल तालुक्यातील शिरसाड गावात रविवारी पाणीपुरवठा करण्यात आला. यावेळी नळाला आलेले पाणी भरण्यासाठी गलीराम धनगर हे धावपळ करीत मोटर सुरू करण्यासाठी गेले. याचवेळी त्यांना जोराचा विद्युत धक्का बसला आणि यात ते जमिनीवर कोसळले. त्यांना तेथून बेशुद्धावस्थेत यावल ग्रामीण रुग्णालयात उपचारासाठी आणण्यात आले. मात्र, वैद्यकीय अधिकाऱ्यांनी तपासणी करून धनगर यांना मृत घोषित केले. या प्रकरणी यावल पोलीस ठाण्यात जितेंद्र धनगर यांनी दिलेल्या खबरीवरून अकस्मात मृत्यूची नोंद करण्यात आली. तपास पोलीस निरीक्षक राकेश मानगावकर यांच्या मार्गदर्शनाखाली हवालदार सिकंदर तडवी करीत आहेत.
