जळगाव (प्रतिनिधी) खूनाचा प्रयत्न, दरोडा, जबरी चोरी, दंगल, सरकारी कर्मचाऱ्यावर हल्ला व जाळपोळ करणे असे २६ गंभीर गुन्हे दाखल असलेल्या तीन जणांच्या टोळीवर हद्दपारीची कारवाई करण्यात आली. यामध्ये टोळी प्रमुख मुकेश प्रकाश भालेराव (वय २७, रा. राहुलनगर याच्यासह भरत मधुकर महाजन (वय २७, रा. शिवपूर कन्हाळा रोड) व शामल शशिकांत सपकाळे (वय २७, रा. न्यू. सातारा, भुसावळ)यांना दोन वर्षांसाठी हद्दपार करण्यात आले आहे.
जिल्ह्यातील गुन्हेगारीला रोखण्यासाठी जिल्हा पोलीस दलाकडून कठोर कारवाईचे पाऊल उचलले जात आहे. रेकॉर्डवरील सराईत गुन्हेगारांसह टोळींवर देखील कारवाई केली जात आहे. दरम्यान, भुसावळातील टोळीने गुन्हे करणाऱ्या टोळीवर भुसावळ शहर व तालुका, शनिपेठ पोलीस स्टेशन, यावल, फैजपुर याठिकाणी खूनाचा प्रयत्न, दरोडा, जबरी चोरी, जाळपोळ करणे, गंभीर दुखापत, दंगल, स्त्री अत्याचार, घातक हत्यार बाळगणे, दुखापत, सरकारी कर्मचाऱ्यावर हल्ला, गैर कायदा दारु बाळगणे, आदेशांचे उल्लंघन करणे, मारमारी, शिवीगाळ यासह तब्बल २६ गंभीर गुन्हे या टोळीने करुन त्यांनी दहशत परविलेली आहे.
या टोळीची नागरिकांमध्ये भिती निर्माण झाल्यामुळे कायदा व सुव्यवस्था अबाधित ठेवण्यासाठी त्यांच्याविरुद्ध कठोर कारवाई होण्यासाठी त्यांच्या हद्दपारीचा प्रस्ताव भुसावळ शहर पोलीस ठाण्याचे पोलीस निरीक्षक गजानन पडघन यांनी तयार केला होता. त्या प्रस्तावाला पोलीस अधीक्षक एम. राजकुमार यांनी मंजूरी देत मुकेश भालेराव, भरत महाजन व शामल सपकाळे या तिघांना दोन वर्षांसाठी हद्दपार करण्यात आले आहेत.
ही कारवाई पोलीस अधीक्षक एम. राजकु मार यांच्या मार्गदर्शनाखाली स्थानिक गुन्हे शाखेचे वरिष्ठ पोलीस निरीक्षक किसन नजन पाटील, पोलीस निरीक्षक गजानन पडघन, सपोनि अनिल मोरे, सफौ अनिल चौधरी, पोहेकॉ पराग सोनवणे, पोना जाकीर मन्सूरी, किशोर इंगळे यांनी तर एलसीबीचे अनिधस्त पोलीस अंमलदार सफौ युनूस शेख इब्राहीम, सुनिल दामोदरे यांच्या पथकाने केली.
