जालना (वृत्तसंस्था) महापालिकेच्या एका कनिष्ठ लिपिकास लाचलुचपत प्रतिबंधक विभागाने मंगळवारी (दि. २९) ८०० रुपयांची लाच स्वीकारताना रंगेहाथ पकडले. नदीम अब्दुल रहेमान चौधरी (३३, रा. खडकपुरा), असे लाच स्वीकारणाऱ्या लिपीकाचे नाव असून, तक्रारदाराच्या वडिलोपार्जित घराचा महापालिकेच्या रिव्हीजन रजिस्टरमधील उतारा देण्यासाठी त्याने हजार रुपयांच्या लाचेची मागणी केली होती.
या प्रकरणातील तक्रारदार यांचे बडीसडक भागात पणजोबाचे घर आहे. या घराची महापालिकेच्या रिव्हिजन रजिस्टरमधील नक्कल मिळविण्यासाठी त्यांनी महापालिकेत अर्ज केला. होता. या कामासाठी महापालिकेच्या अग्निशमन विभागातील फायरमन व कनिष्ठ लिपीकाचा अतिरिक्त कारभार पाहणाऱ्या नदीम चौधरी याने एका हजार रुपयांच्या लाचेची मागणी केली. तडजोडीअंती ८०० रुपये स्वीकारण्याचे मान्य केले. दरम्यान, लाच देण्याची इच्छा नसल्याने तक्रारदार यांनी लाचलुचपत प्रतिबंधक विभागाकडे तक्रार केली होती. पडताळणीमध्ये लिपीक चौधरी याने लाच मागितल्याचे निष्पन्न झाल्यानंतर लाचलुचपत विभागाने महापालिकेतच्या आवारातच सापळा लावून लिपीक नदीम चौधरी यास ८०० रुपयांची लाच स्वीकारताना रंगेहाथ पकडले.
या प्रकरणी कदीम जालना पोलीस ठाण्यात गुन्हा दाखल करण्यात आला आहे. लाचलुचपत विभागाचे पोलीस अधीक्षक संदीप आटोळे, अप्पर अधीक्षक विशाल खांबे यांच्या मार्गदर्शनाखाली जालना येथील उपअधीक्षक किरण बिडवे, पोलीस निरीक्षक सुजित बडे, गणेश चेके, जावेद शेख, गजानन खरात, शिवलिंग खुळे, ज्ञानदेव जुंबड, शिवाजी जमधडे, गजानन घायवट, कृष्णा देठे, गजानन बुजाडे, संदीपान लहाने, आत्माराम डोईफोडे, प्रवीण खंदारे, विठ्ठल कापसे यांनी ही कारवाई केली.
