अमरावती (वृत्तसंस्था) येथील समाज कल्याण विभागांतर्गत येणाऱ्या इतर मागास, बहुजन कल्याण विभागाच्या प्रादेशिक उपसंचालक कार्यालयातील कनिष्ट लिपिकाला लाचलुचपत प्रतिबंधक विभागाने दहा हजार रुपये लाच घेताना रंगेहात अटक केली आहे. सत्यवान रामचंद्र बांबोर्डे (५३) असे लाचखोर कनिष्ट लिपिकाचे नाव आहे.
या संदर्भात अधिक असे की,तक्रारदार यांची पत्नी समाज कल्याण विभागांतर्गत चालविण्यात येणाऱ्या श्री गोविंद गुरुकुल आश्रम शाळा, रिद्धपूर या संस्थेमधून दि. ३१ जुलै रोजी अधीक्षक पदावरून सेवानिवृत्त झाल्या. निवृत्तीनंतर मिळणारे लाभ, जीपीएफ व पदोन्नती बिल मिळण्यासाठी तक्रारदाराने गतवर्षी अर्ज केला. त्या बिलाबाबत विचारणा केली असता बांबोर्डे याने बिल लवकरात लवकर मिळवून देण्याकरिता १२ हजाराची लाचेची मागणी केली.
लाचलुचपत प्रतिबंधक विभागाने लाच मागितल्याची पडताळणी केल्यानंतर बांबोर्डे याने तडजोडीअंती पहिला टप्पा दहा हजार रुपये व बिल मंजूर झाल्यावर दोन हजार रुपये असे लाचेची मागणी करून रक्कम स्वीकारण्याचे मान्य केले. त्यामुळे मंगळवारी एसीबीने कार्यालयात सापळा रचला. लाचलुचपत प्रतिबंधक विभागाने ४ जुलै रोजी त्याला त्याच्याच कार्यालयात रंगेहात अटक केली.
आरोपीविरुद्ध फ्रेजरपुरा पोलिस ठाण्यात गुन्हा दाखल करण्यात आला. ही कारवाई लाचलुचपत प्रतिबंधक विभागाचे पोलिस अधीक्षक मारुती जगताप, अपर पोलिस अधीक्षक देवीदास घेवारे, उपअधीक्षक शिवलाल भगत यांच्या मार्गदर्शनात पोलिस निरीक्षक केतन मांजरे यांच्या नेतृत्वातील अंमलदार वैभव जयाले, युवराज राठोड, राहुल वंजारी, विनोद धुळे, नितेश राठोड, चालक पोउपनि सतीश किटुकले आदींनी केली.
