मुक्ताईनगर (प्रतिनिधी) वढोदा वनपरिक्षेत्रातील डोलारखेडा वन परिमंडळातील दक्षिण डोलारखेडा बिटचे वनरक्षक बापूसाहेब भिका थोरात ( वय ५०) यांचे हृदयविकाराने १० ऑक्टोबरला सकाळी ६.३० वाजता निधन झाले.
वढोदा वनविभागातील दक्षिण डोलारखेड्यात पट्टेदार वाघाचा मुक्त संचार आहे. अशा संवेदनशील बिटमध्ये गेल्या ३ वर्षांपासून बापूसाहेब थोरात कर्तव्य पार पाडत होते. मंगळवारी ते आपल्या कर्तव्यावर असताना परिवार आहे. सकाळी ५ वाजता अचानक त्यांच्या छातीत दुखायला लागले. त्यानंतर ते वनमजूर तुकाराम गवळे यांना घेऊन मुक्ताईनगर येथील रुग्णालयात गेले. तेथे त्यांच्यावर औषधोपचार करण्यात आले व पुढील उपचारासाठी त्यांना जळगाव येथे जाण्यास सांगितले. परंतू जळगाव येथे गेले असता हृदयविकाराने त्यांची प्राणज्योत मालवली.
बापूसाहेब थोरात हे मूळचे पारोळा तालुक्यातील देवगाव येथील रहिवाशी असून ९ एप्रिल २०१० पासून ते जळगाव वन विभागात कार्यरत झाले. त्यांनी पाचोरा, पाल व वढोदा येथे कर्तव्य पार पाडले. डोलारखेडा बिटमध्ये कर्तव्य पार पाडतांना त्यांचे निधन झाल्याने ‘पट्टेदार वाघाचा राखणदार सातपुड्याच्या कुशीत विसावला’ अशा शब्दांत इथल्या वन प्रेमींनी शोक सहवेदना व्यक्त केल्या आहेत. त्यांच्या पश्चात पत्नी, आई-वडील, २ मुले, भाऊ असा परिवार आहे. वढोदा वनपरिक्षेत्रात दक्षिण डोलारखेडा हे पट्टेदार वाघाचे भ्रमण क्षेत्र आहे. त्याचे अस्तित्व जपण्यासाठी डोळ्यात तेल घालून कर्तव्य निभावणारे वनरक्षक बापूसाहेब भिका थोरात यांचे मंगळवारी सकाळी हृदयविकाराने निधन झाले.
