जळगाव (प्रतिनिधी) स्वातंत्र्याच्या अमृत महोत्सवानिमित्त ‘उज्ज्वल भारत उज्ज्वल भविष्य – पॉवर@२०४७’ उपक्रमांतर्गत ऊर्जा महोत्सवाचा भडगाव येथील मयुरेश मंगल कार्यालयात आयोजित शानदार समारंभात शुभारंभ करण्यात आला.
कार्यक्रमाच्या अध्यक्षस्थानी जिल्हाधिकारी अभिजित राऊत तर प्रमुख अतिथी म्हणून जिल्हा परिषदेचे मुख्य कार्यकारी अधिकारी डॉ.पंकज आशिया, महावितरणच्या जळगाव परिमंडलाचे मुख्य अभियंता कैलास हुमणे, जळगाव मंडलाचे अधीक्षक अभियंता फारुख शेख, पॉवर फायनान्स कॉर्पोरेशनचे दुर्गेश रंगारी, तहसीलदार हिवाळे , गटविकास अधिकारी वाघ उपस्थित होते.
ऊर्जा ही समाजाचा अविभाज्य घटक असून शासनाच्या योजना प्रभावीपणे राबवून यंत्रणा अधिक सक्षम करावी, असे आवाहन जिल्हाधिकारी राऊत यांनी या प्रसंगी केले. तर देशाच्या प्रगतीत महत्त्वपूर्ण योगदान देणाऱ्या महावितरणचे वीजबिल नियमित भरणे ही एक प्रकारची देशसेवाच आहे. त्यामुळे वीजबिल भरून महावितरणला सहकार्य करण्याची विनंती मुख्य अभियंता हुमणे यांनी केली. तसेच विविध योजनांची माहिती देत अभय योजनेअंतर्गत कायमस्वरूपी खंडित ग्राहकांना नियमित वीज जोडणी घेण्याचे आवाहन केले.
याप्रसंगी महावितरणच्या योजनेचा लाभ घेणाऱ्या ५ ग्राहकांनी मनोगत व्यक्त केले. त्यांचा मान्यवरांच्या हस्ते सत्कार करण्यात आला. कार्यक्रमाला खा.उन्मेष पाटील यांचे प्रतिनिधी अमोल शिंदे उपस्थित होते. त्यांनी खा.पाटील यांच्यातर्फे जनतेला संदेश दिला. कार्यक्रमाचे प्रास्ताविक उपकार्यकारी अभियंता पराग चौधरी यांनी केले तर सूत्रसंचालन राहुल निकम यांनी केले. कार्यक्रमाच्या यशस्वीतेसाठी कार्यकारी अभियंता विशाल खंडारे, उपकार्यकारी अभियंता योगेश पाटील, रवींद्र राऊळ यांच्यासह जोशी,अजय वाणी, अतुल पाटील, किरण महाजन, वैजीनाथ नाचण, भडगाव उपविभागातील सर्व शाखा अभियंते व सर्व जनमित्रांनी परिश्रम घेतले. कार्यक्रमाला भडगाव परिसरातील नागरिक, वीजग्राहक मोठ्या संख्येत उपस्थित होते.
यावेळी सरकारच्या उत्कृष्ट कामांची माहिती पोस्टर्स व चित्रफितीच्या माध्यमातून देण्यात आली. कार्यक्रमात कलामंचच्या वतीने मयूर भंगाळे, विशाल जाधव, संकेत राऊत, युगंधरा राऊत, मराठे यांनी सांस्कृतिक कार्यक्रम सादर करून विविध योजनांची माहिती दिली.
