पुणे (वृत्तसंस्था) जळगावमध्ये राष्ट्रवादी काँग्रेसचे अध्यक्ष शरद पवार यांच्या उपस्थितीत एकनाथ खडसे यांनी विरोधकांना अद्दल घडवण्याची भाषा केली होती. गृहमंत्रालयाचा हिसका दाखवा, असं आवाहनच त्यांनी शरद पवारांना केलं होतं. त्यावर गिरीश महाजन यांनी खडसेंना जोरदार प्रत्युत्तर दिलंय. लायकी नसताना पक्षानं एकनाथ खडसेंना पद दिली, असा घणाघात महाजनांनी केला आहे.
खडसेंवर टीका करताना महाजन म्हणाले की, लायकी नसताना पक्षानं एकनाथ खडसेंना पदं दिली. ग्रामपंचायतमध्ये पडले. नगरपालिकेत आमचा महापौर आहे. मुलगी विधानसभेला उभी राहिली आणि पडली. मुख्यमंत्री पदाचा उमेदवार असेल तर ग्रामपंचायतीला पडतो का? असा खोचक सवाल महाजनांनी केलाय. खडसेंचं मानसिक संतुलन बिघडलेलं आहे. त्यांचं भाषण मी ऐकलं, म्हणाले दोन चार मानणांना जेलमध्ये टाका. एखादा विक्षिप्त माणूसच असं करू शकतो, अशी टीकाही महाजनांनी केलीय.
खडसेंची नेमकी टीका काय?
शरद पवारांच्या जळगाव दौऱ्यावेळी बोलताना एकनाथ खडसे यांनी भाजपवर जोरदार हल्ला चढवला होता. राज्यात सरकारला बदनाम करण्याचा प्रयत्न सुरु असल्याचा आरोप यावेळी खडसेंनी भाजपवर केला होता. त्यावेळी खडसेंनी गृहमंत्री दिलीप वळसे पाटील यांना दिलेला सल्लाही चर्चेचा विषय ठरतोय. वळसे पाटलांना अनेकदा सांगतो, की गृहमंत्रीपद जे आहे, त्याचा दाखवा एकदा हिसका, दाखवा एकदा इंगा, असं एकनाथ खडसेंनी म्हटलंय. शेकडो प्रकरणं यांची आहेत. दोन चार लोकांना वर्षापूर्वीच टाकून दिलं असतं, तर ही परिस्थिती आली नसती, असंही खडसे म्हणाले.
