धुळे (प्रतिनिधी) हृदय पिळवून टाकणारी एक घटना धुळ्यातून समोर आली आहे. झोळीची दोरी तुटल्याने सहा महिन्याच्या बालिकेचा मृत्यू झाल्याची घटना वरखेडी गावातील खालची भिलाटी भागात घडली. परी जितू सोनवणे ( सहा महिने) असे मृत बालिकेचे नाव आहे.
परी घरातील झोळीत झोपली असताना झोळीची दोरी तुटल्याने ती अचानक खाली पडली.या दुर्घटनेत तिच्या डोक्याला मार लागला. परीला उपचारासाठी खासगी वाहनातून धुळे येथे जिल्हा रुग्णालयात दाखल करण्यात आले. परंतू तेथे डॉ. दिव्या गवळी यांनी तपासून तिला मृत घोषित केले. याबाबत तिच्या वडिलांनी दिलेल्या माहितीवरून तालुका पोलिस ठाण्यात अकस्मात मृत्यूची नोंद करण्यात आली आहे.
शिरपूरमध्ये झोपेतच बालकाचा मृत्यू
शिरपूर शहरातील क्रांती नगरात ९ रोजी संध्याकाळी ७:३० वाजेच्या सुमारास सुदर्शन रमेश सोनार (वय ६ महिने) हा बालक घरातील पलंगावर झोपलेला असताना त्याचे वडील रमेश सोनार हे त्यास पाहण्यासाठी गेले असता तो काहीएक हालचाल करीत नव्हता. त्यामुळे त्यांनी लागलीच बालकाला इंदिरा गांधी मेमोरियल हॉस्पिटलला दाखल केले, तेथून येथील उपजिल्हा रुग्णालयात दाखल केले असता डॉ. अमोल जैन यांनी तपासून मृत घोषित केले. याबाबत शिरपूर पोलिसात अकस्मात मृत्यूची नोंद दाखल करण्यात आली.
