अमळनेर (प्रतिनिधी) शहरातील उत्कृष्ठ फर्निचर कारागीर संदीप नारायण रुल्हे हे रात्रीच्यावेळी आपल्या परिवारासह झोपले होते. तेवढ्यात भलामोठा साप त्यांच्या अंगावरून मुलीच्या अंगावर गेला. त्याला पकडून बाजूला फेकले. परंतु काही मिनिटातच त्याचा त्रास होवू लागला आणि संदीप रुल्हे यांचा मृत्यू झाल्याने सुतार कुटुंबाचा आधारवडच हरपला आहे.
यासंदर्भात अधिक असे की, अमळनेर शहरात उत्कृष्ठ फर्निचर कारागीर म्हणून संदीप नारायण रुल्हे यांची ओळख होती. शहरातील लक्ष्मीनगरातील निवासस्थानी रविवारी (ता. १७) रात्री नेहमीप्रमाणे संदीप हे पत्नी, आई आणि लहान मुलगा व मुलगी यांच्यासह झोपले होते. पहाटे चारच्या सुमारास अचानक त्याला अंगावरून काही जात असल्याचा भास झाल्याने संदीप दचकून उठला. पाहिले तर अंगावरून सर्प गेला होता. त्यानंतर तो सर्प मुलीच्या अंगावर गेला. मुलीच्या तोंडावर त्याचा स्पर्श झाल्याने तीही दचकून उठली. तेवढ्यात संदीपने तो सर्प तिच्या अंगावरून दूर फेकला. आवाजाने सारे कुटुंबच जागे होऊन आई सर्पाचा शोध घेऊ लागली.
अर्धा– एक तास होत नाही, तोच संदीपला मळमळ होऊन उलटीसह हातपायास मुंग्या येऊ लागल्याने फोनद्वारे खासगी डॉक्टरांच्या सल्ल्यानुसार संदीप सकाळी डॉ. निखिल बहुगुणे यांच्या रुग्णालयात नेण्यात आले. तोपर्यंत त्याची प्रकृती अत्यंत गंभीर होऊन कालांतराने त्याची प्राणज्योत मालवली. दुर्देवाने डॉ. बहुगुणे यांनी त्यास मृत घोषित केले. त्यानंतर अमळनेर ग्रामीण रुग्णालयात शवविच्छेदन केल्यानंतर शोकाकुल वातावरणात संदीपवर अमळनेर येथेच अंत्यसंस्कार करण्यात आले. मृत्यूच्या आधी संदीपने डॉक्टरांना स्वतः सांगितलेली लक्षणे पाहता सर्पदंशानेच संदीपचा बळी गेल्याचे स्पष्ट झाले. संदीप यांच्या पश्चात पत्नी, आई व लहान मुलगा व मुलगी आहे.
