पाळधी ता. धरणगाव (प्रतिनिधी) आपल्या काकूसोबत शेतात निंदणीसाठी गेलेल्या एका १३ वर्षीय मुलाचा सर्पदंशाने मृत्यू झाल्याची दुर्दैवी घटना ३१ ऑगस्ट रोजी दुपारी घडली. करण राजू बारेला (१३, रा. वैजापूर, ता. चोपडा, ह.मु. पाळधी खुर्द ता. धरणगाव), असे मृत मुलाचे नाव आहे.
चोपडा तालुक्यातील वैजापूर येथील रहिवासी राजू बारेला हे त्यांची धरणगाव तालुक्यातील पाळधी खुर्द गावात वास्तव्याला आहेत. राजू बारेला यांचा लहान मुलगा करण बारेला हा गुरुवार ३१ ऑगस्ट रोजी गावातील शेतात निंदणीच्या कामासाठी त्याच्या काकूसोबत गेलेला होता. दुपारी चार वाजेच्या सुमारास शेतात काम करत असताना त्याच्या पायाला सापाने चावा घेतला. यानंतर तो बेशुद्ध पडल्याने शेतात काम करणाऱ्या मजुरांनी त्याला शासकीय वैद्यकीय महाविद्यालय व रुग्णालयात उपचारार्थ दाखल केले. परंतू उपचार सुरू असताना रात्री त्याचा मृत्यू झाला. मयत करणच्या पश्चात आई, वडील, मोठा भाऊ आणि बहीण असा परिवार आहे. याप्रकरणी जळगाव तालुका पोलिस ठाण्यात अकस्मात मृत्यूची नोंद करण्यात आली आहे.
