मुंबई (वृत्तसंस्था) मराठमोळी अभिनेत्री रिंकू राजगुरू आणि ‘छूमंतर’ सिनेमाची टीम सध्या लंडनमध्ये अडकली आहे. रिंकू गेल्या काही दिवसांपूर्वी ‘छूमंतर’ चित्रपटाच्या शूटिंगसाठी इंग्लंडला गेली होती. मात्र, नव्या कोरोना व्हायरसमुळे ब्रिटनमध्ये लॉकडाऊन लागू करण्यात आले आहे. तसेच भारताने ३१ डिसेंबरपर्यंत ब्रिटनहून भारतात येणाऱ्या सर्व विमानसेवा बंद केल्या आहेत. याचा फटका रिंकू आणि संपूर्ण ‘छूमंतर’ चित्रपटाच्या टीमला बसला आहे.
‘सैराट’ चित्रपटामुळे घराघरात लोकप्रिय झालेली ‘आर्ची’ सध्या लंडनमध्ये अडकली आहे. ‘छूमंतर’ सिनेमाच्या शूटिंगनिमित्त इंग्लंड दौऱ्यावर असलेली अभिनेत्री रिंकू राजगुरुला लॉकडाऊनचा फटका बसला. ब्रिटनमध्ये सापडलेल्या कोरोनाच्या नव्या स्ट्रेनमुळे रिंकूला लंडनमध्येच थांबून राहावे लागत आहे. रिंकूसोबत ‘छूमंतर’ सिनेमाची टीमही इंग्लंडमध्येच आहे. समीर जोशी दिग्दर्शित ‘छूमंतर’ सिनेमाचे चित्रिकरण इंग्लंडमध्ये सुरु आहे. यामध्ये रिंकू राजगुरुसोबत प्रार्थना बेहरे, सुव्रत जोशी, रिषी सक्सेना, ‘नाळ’ चित्रपट फेम बालकलाकार श्रीनिवास पोकळेही तिथे शूटिंग करत आहेत. गेल्या महिन्यापासून लंडनमध्ये सिनेमाचे शूटिंग सुरु होते. रिंकू राजगुरुची ही पहिलीच आंतरराष्ट्रीय ट्रीप आहे. “मुंबई ते लंडन प्रवासादरम्यान मी प्रचंड एक्साईट होते. विमानतळांवर कोरोनापासून बचाावासाठी सर्व प्रकारची काळजी घेतली जात आहे.” अशी प्रतिक्रिया रिंकूने दिल्याचं काही मीडिया रिपोर्ट्समध्ये पाहायला मिळालं. रिंकूने सोशल मीडियावरही काही फोटो शेअर केले आहेत. तसेच लॉकडाऊनमुळे अनेक मोठे अभिनेते-अभिनेत्री इंग्लंडमध्ये अडकले आहेत. प्रख्यात बॉलिवूड अभिनेत्री प्रियंका चोप्रा सध्या इंग्लंडमध्ये आहे. याशिवाय अभिनेता संतोष जुवेकरही लॉकडाऊनमुळे लंडनमध्येच अडकला आहे.
नव्या कोरोना विषाणूच्या पार्श्वभूमीवर जगातील अनेक देशांनी ब्रिटनमधून येणाऱ्या विमानांवर बंदी घातली आहे. पूर्वीच्या कोरोना विषाणूपेक्षा नव्या विषाणू अधिक घातक असून त्याचा प्रादुर्भावदेखील अधिक जलद गतीने होतो, असं तज्ञांचं मत आहे. त्यामुळे योग्य खबरदारी घेणं गरजेचं असल्याचंही सरकारकडून सांगण्यात येत आहे. याशिवाय ब्रिटनहून येणाऱ्या प्रवाशांसाठी केंद्र सरकारने गाईडलाईन्स जाहीर केल्या आहेत.
