वरणगाव (प्रतिनिधी) स्वतःसाठी आणलेली दारू पत्नीने पिल्यामुळे संतापाच्या भरत पतीने तिला बेदम मारहाण करत गळा दाबून खून केल्याची खळबळजनक घटना भुसावळ तालुक्यातील हतनूर येथे घडली. शांतीदेवी हेमब्रम, असे मयत पत्नीचे तर जितेंद्र हेमब्रम असे आरोपीचे नाव आहे. या प्रकरणी पोलिसांनी संशयित पतीला अटक केली आहे.
हतनूर येथील वाढीव दरवाजाचे काम गेल्या काही वर्षापासून सुरू आहे. या ठिकाणी परराज्यातील मजूर कामासाठी आले असून ते तेथेच राहतात. ते तेथेच राहतात. यापैकी जितेंद्र हेमब्रम व शांतीदेवी जितेंद्र हेमब्रम हे दोघे ही येथे मजुरीचे काम करतात. रविवारी दुपारी जितेंद्र याने स्वतःस पिण्यासाठी आणलेले मद्य पत्नी व शेजारी असलेल्या करणी शिवराम यादव या दोघांनी प्राशन केले. त्यामुळे शांतिदेवीचा पती जितेंद्र गंगाराम हेमब्रम याला राग आला.
या रागातच त्याने पत्नी शांतीदेवीला रविवारी दुपारी ४ वाजेच्या सुमारास चापटाबुक्क्यांनी तसेच कमरेच्या पट्ट्याने मारहाण केली. यानंतर मद्याच्या नशेत पत्नीचा गळा दाबला. यानंतर सायंकाळी साप चावल्याचे कारण सांगून वरणगाव ग्रामीण रुग्णालयात उपचारार्थ दाखल केले. दरम्यान, या प्रकरणी वरणगाव पोलिसांत अकस्मात मृत्यूची नोंद करण्यात आली होती. परंतु वैद्यकीय अधिकारी डॉ. गिरीश उगले यांना मृत महिलेच्या अंगावर साप चावल्याचे कोणतेही खून दिसली नाही. त्यामुळे आज सकाळी मृत महिलेचे शवविच्छेदन करण्यात आले. यात त्यांचा गळा आवळल्याचे उघड झाले. यामुळे वरणगावचे हवालदार नावेद अली सादीक अली सय्यद यांच्या फिर्यादीवरून वरणगाव पोलिसांत कलम ३०२, ३२४, ३२३ प्रमाणे गुन्हा दाखल करण्यात आला आहे. या घटनेचा तपास स. पो. नि. आशिषकुमार आडसूड, उपनिरिक्षक परशुराम दळवी, पीएसआय किशोर पाटील, हवालदार नावेद अली करत आहेत.
