नोएडा (वृत्तसंस्था) नोएडा येथे दोन चालत्या गाड्यांवर चढून फिल्मी स्टाइलमध्ये स्टंट करणाऱ्या तरुणाला पोलिसांनी अटक केली आहे. याशिवाय दोन्ही कार आणि एक मोटरसायकल पोलिसांनी जप्त केली आहे. व्हायरल व्हिडीओमध्ये एक तरुण दोन गाड्यांवर फिल्मी स्टाइलमध्ये स्टंट करताना दिसत आहे. या व्हायरल व्हिडीओची दखल घेत सेक्टर ११३ पोलिस स्टेशनने या व्यक्तीवर कारवाई केली.
राजीव पुत्र राजेंद्र असं या तरुणाचं नाव असून तो 21 वर्षांचा आहे. तो गौतमबुद्ध नगर इथल्या सोरखा गावात राहतो. पोलिसांची स्टंटबाजी करणाऱ्या तरुणासह वाहनं देखील जप्त केली. यासोबतच आरोपीचा व्हिडीओही ट्विटरवर जारी करण्यात आला आहे.
सेक्टर-113 पोलीस स्टेशनचे प्रभारी शरद कांत म्हणाले की, व्हिडीओच्या आधारे त्या व्यक्तीचा शोध घेण्यात आला. त्याची ओळख राजीव असे असून तो सोरखा गावचा रहिवासी आहे आणि त्याला अटक करण्यात आली आहे. व्हिडीओ बनवण्यासाठी वापरण्यात आलेल्या दोन एसयूव्ही आणि एक मोटारसायकल जप्त करण्यात आली आहे.”
सोशल मीडियासाठी व्हिडीओ
शरद कांता पुढे म्हणाले की, “स्टंट करताना वापरण्यात आलेल्या वाहनांमध्ये टोयोटा फॉर्च्युनर आणि राजीवची मोटारसायकल आहे. व्हिडीओसाठी त्याने नातेवाईकाकडून दुसरी फॉर्च्युनर कार घेतली होती. हा तरुण कोणतंही काम करत नाही, परंतु तो चांगल्या कुटुंबातील आहे. तो सोशल मीडियासाठी व्हिडीओ बनवत होता. त्याच्याविरुद्ध मोटार वाहन कायद्यान्वये गुन्हा दाखल करण्यात आला आहे.”
