जळगाव (प्रतिनिधी) एमआयडीसीतील एका प्लास्टीक कंपनीत कामाच्या पहिल्याच दिवशी मशनिरीचा शॉक लागून एका तरुणाचा जागीच मृत्यू झाल्याची दुर्दैवी घटना रविवारी सकाळी ८ वाजेच्या सुमारास घडली. राहूल दरबार राठोड (वय २२, रा. शेलगाव ता. बऱ्हाणपूर मध्यप्रदेश ह.मु. फातीमा नगर ), असे मयत तरुणाचे नाव तर जीवन गजानन चौधरी (रा. बेटावद ता. जामनेर ) हा तरुण गंभीर जखमी झाला असून त्याच्यावर उपचार सुरु आहे.
नेमकं काय घडलं !
राहुल राठोड हा कुटुंबियांसह फातेमा नगरात वास्तव्यास होता. पुर्वी तो वेल्डींगचे काम करुन कुटुंबाचा उदनिर्वाह करीत होता. परंतु सोमवारपासून तो एमआयडीसीतील एस २८ सेक्टरमधील एका प्लास्टीकच्या कंपनीत कामाला लागला होता. सकाळी ८ वाजेच्या सुमारास तो कामावर हजर झाला. मशिनवरीवर काम करीत असतांना राहुल व त्याच्यासोबत काम करणाऱ्या जीवन चौधरी यांना मशिनरीचा शॉक लागून जबर झटका बसल्याने ते दोघे दूर फेकले गेले. यामध्ये राहुल राठोड याचा दुर्देवी मृत्यू झाला तर जीवन चौधरी या तरुण गंभीररित्या जखमी झाला असून त्याच्यावर खासगी रुग्णालयात उपचार सुरु आहे.
कुटुबियांचा काळीज चिरणारा आक्रोश !
गेल्या काही वर्षांपासून राहूल राठोड हा एमआयडीसीतील एका कंपनीत वेल्डींगचे काम करीत होता. काही वर्षांपुर्वी झालेल्या अपघातात त्याच्या वडीलांना अपंगत्व आले आहे. त्यामुळे राहुल हा घरातील कर्ता पुरुष असून त्याच्यावर कुटुंबाचा उदनिर्वाह सुरु होता. दुर्देवी काळाने झडप घालीत त्याला हिरावून घेतल्याने राठोड कुटुंबियांवर दुःखाचा डोंगर कोसळला आहे. कंपनीत कामावर रुजू होण्याच्या पहिल्याच दिवशी राहुलचा त्याचा दुदैवी अंत झाल्याने जिल्हा रुग्णालयात राहुलचा मृतदेह बघून त्यांच्या कुटुंबियांनी मन हेलावणारा आक्रोश केला. याप्रकरणी एमआयडीसी पोलीसात अकस्मात मृत्यूची नोंद करण्यात आली आहे.
२० मिनिटानंतर लक्षात आली घटना !
सुमारे वीस मिनिटानंतर ही घटना राहुल सोबत काम करणाऱ्यांच्या लक्षात आली. त्यांनी तात्काळ खासगी वाहनातून त्यांना जिल्हा शासकीय वैद्यकीय महाविद्यालयात दाखल करण्यात आले. यावेळी वैद्यकीय अधिकारी डॉ. निरंजन देशमुख यांनी तपासणी केली असता मयत घोषीत केले. तर जखमीस खासगी रुग्णालयात हलविण्यात आले.
