वरणगाव (प्रतिनिधी) येथील रेणुका नगरमधील फॅक्ट्री कर्मचारी महिला कामावर गेल्याची संधी साधून अज्ञात चोरट्याने घरातील रोकड व सोन्याच्या दागिन्यांवर भरदिवसा डल्ला मारल्यामुळे प्रचंड खळबळ उडाली आहे.
रेणुका नगरमध्ये राहाणाऱ्या प्रतिभा नितीन वराडे यांना अनुकंपा तत्वावर वरणगांव फॅक्टरीमधे नोकरी लागली आहे . सकाळी ७ वाजेपासुन त्या कामावर गेल्या होत्या. सायंकाळी ५ वाजेच्या सुमारास घरी आल्यावर घरात चोरी झाल्याचे त्यांना समजले. त्यांनी शेजारी असलेले संजीव कोलते यांना बोलवत लागलीच वरणगाव पोलिसांना फोन करुन घटनेबाबत माहिती दिली. प्रतिभा वराडे यांनी फिर्यादीमध्ये म्हटले आहे की. घरातील ३ तोळयाची सोन्याची पोत व ७ हजार रोख असा एकूण ६७ हजार रूपयाचा ऐवज चोरीला गेला आहे.
दुसऱ्या घटनेत मकरंद नगरमधील विशाल गजानन जोशी यांचेफिर्यादीवरून त्यांचे घरातील १२ ग्रॅम वजनाच्या ३ लक्ष्मीनारायणाच्या प्रतिमा चोरीस गेल्याची नोंद करण्यात आली आहे. चोरीचा माग काढण्यासाठी श्वानपथकाला पाचारण करण्यात आले होते. श्वानाने फक्त महामार्गावरील विष्णू प्लायच्या दुकानापर्यंत मार्ग दाखविला. दरम्यान, दोन्ही चोरींचा तपास पी.एस.आय. सुनिल वाणी व गणेश शेळके करीत आहेत .
