जळगाव (प्रतिनिधी) मनाची इच्छा पूर्ण होण्यासाठी बोटातील अंगठी शंभराच्या नोटमध्ये गुंडाळून ठेवा. असे सांगून दोन जणांनी सुरेश पंढरीनाथ भोळे (वय ७२, रा. माऊली नगर) यांची अंगठी हातचालाखी करीत लांबवून नेली. ही घटना सोमवारी भर दिवसा घाणेकर चौकात घडली. या प्रकरणी दोन अनोळखींविरुद्ध शनिपेठ पोलिस ठाण्यात गुन्हा दाखल करण्यात आला आहे.
शहरातील माऊलीनगरात सुरेश भोळे हे वास्तव्यास आहे. सोमवारी दुपारच्या सुमारास ते वृद्ध घाणेकर चौकामध्ये एका केळी विक्रीच्या हातगाडीजवळ उभे होते. त्यावेळी एक जण त्यांच्याजवळ आला आणि त्याने वृद्धाला आश्रमाचा पत्ता विचारला. काही वेळाने दुसरा संशयित इसम त्यांच्याजवळ आला आणि तो देखील वृद्धासोबत बोलू लागला. वृद्धासोबत बोलणाऱ्या पहिल्या व्यक्तीने मी देवमाणूस आहे असे सांगत वृद्धाला हातात दगड ठेवण्यास सांगितले व तो तेथून मंदिराजवळ निघून गेला. दुसरा व्यक्ती वृद्धास मंदिराजवळ घेऊन गेला व तेथे उभ्या असलेल्या देवमाणूस म्हणवून घेणाऱ्याने मूठ उघडण्यास सांगितली असता दगडाचा रुद्राक्ष झाल्याचे आढळून आले. नोटमध्ये गुंडाळलेली अंगठी पिशवीत ठेवली. रुद्राक्ष तयार झाल्यानंतर सुरेश भोळे यावृद्धास त्यांच्या बोटातील अंगठी शंभराच्या नोटमध्ये गुंडाळून ठेवण्यास सांगितली ती पुडी वृद्धाच्या पिशवीत ठेवल्याची त्यांनी वृद्धाला बतावणी केली.
मागे बघताच दोघेही दिसून आले नाही
वृद्ध भोळे यांना पिशवीत अंगठी दिसून न आल्याने त्यांनी लागलीच मागे वळून बघितले. यावेळी त्यांना फसवणुक करणारे दोघेही त्याठिकाणी दिसून आले नाही. त्यांनी लागलीच शनिपेठ पोलिसात धाव घेत आपबिती कथन केली. त्यांनी दिलेल्या तक्रारीवरुन शनिपेठ पोलीस ठाण्यात अनोळखींविरुद्ध फसवणुकीचा गुन्हा दाखल करण्यात आला आहे.
