जळगाव (प्रतिनिधी) – सराफाच्या दुकानात हातचालाखी करून दागिने लांबविल्यानंतर फरार झालेल्या मोहम्मद अली लियाकत अली सय्यद (वय ३८, रा. पापा नगर, इराणी वस्ती भुसावळ) याच्या अकोला शहरातून एलसीबीच्या पथकाने मुसक्या आवळल्या. पोलिसांनी केलेल्या चौकशीत दोन पोलीस ठाण्याच्या हद्दीत दाखल गुन्ह्यातील ४८ ग्रॅम सोने हस्तगत करण्यात आले.
बोदवड पोलीस ठाण्याच्या हद्दीतील सराफाच्या दुकानातून सोन्याचे दागिने लांबविल्याप्रकरणी गुन्हा दाखल करण्यात आला होता. या गुन्हा उघडकीस आणण्यासाठी परि. उपअधीक्षक प्रशांत दरेकर यांच्या मार्गदर्शनाखाली स्थानिक गुन्हे शाखेचे पोलीस निरीक्षक राहुल गायकवाड यांनी उपनिरीक्षक संतोष पवार, पोहेकॉ उमाकांत पाटील, गोपाळ गव्हाळे, विकास सातदिवे, प्रशांत परदेशी, राहुल वानखेडे, संदीप चव्हाण, रिजवान शेख यांच्यासह तांत्रिक विश्लेषक गौरव पाटील, मिलींद जाधव यांचे पथक तयार केले. पथकाकडून संशयितांच्या शोध घेत असतांना तांत्रिक विश्लेषणाच्या आधारावर गुन्ह्यात फरार असलेला संशयित मोहम्मद अली लियाकत अली सय्यद हा अकोला येथे असल्याची माहिती मिळाली.
चौकशीत काढून दिले ४८ ग्रॅम सोने
पथकाने सापळा रचून अकोला येथून संशयित मोहम्मद अली सय्यद याच्या मुसक्या आवळल्या. त्याची कसून चौकशी केल्यानंतर तालुका पोलीस ठाण्याच्या हद्दीत घडलेल्या गुन्ह्यात ३२ ग्रॅम ४०० मिली सोन्याचे लगड व बोदवड पोलीस ठाण्यात दाखल गुन्ह्यात १५.८ ग्रॅम असा एकूण ४ लाख ९५ हजार रुपये किंमतीचा ४७ ग्रॅम ४८ मिली सोन्याची लगड हस्तगत करण्यात आली.
