धरणगाव (प्रतिनिधी) शहरासह परिसरातून मागील काही दिवसापूर्वी मोटार सायकली चोरीला जाण्याच्या घटना वाढल्या होत्या. याच दरम्यान, रात्री गस्तीवर असणाऱ्या पथकाने दोन संशयितांना पाठलाग करून ताब्यात घेतले होते. चौकशी दरम्यान, धरणगाव पोलिसांनी खाक्या दाखवताच दोघं चोरट्यांनी चार मोटार सायकली काढून दिल्या आहेत.
या संदर्भात अधिक असे की, १२ व १६ जानेवारीला मोटार सायकल चोरीचे एक-एक गुन्हा दाखल होता. याच दरम्यान, रात्री गस्तीवर असणाऱ्या पोलीस पथकाने निरंजन पाटील (रा.शेवगाव) आणि सागर वालदे (रा.मालपुर ता. पारोळा) अशा दोघांना नागरिकांच्या मदतीने पाठलाग करून पकडले होते. त्यानंतर संशयितांची न्यायालयीन कोठडीत रवानगी झाली होती. परंतू सोमवारी धरणगाव कोर्टाकडून दाखल असलेल्या दुसऱ्या मोटार सायकल चोरीच्या गुन्ह्यात दोघं आरोपींना ट्रान्स्फर करून घेतले होते. त्यानंतर दोघं आरोपींकडून ४ मोटार सायकल जप्त करण्यात आले आहेत. त्यापैकी धरणगाव येथून २, एरंडोल येथून १ तर चोपडा येथून १ मोटारसायकल चोरल्याची कबुली दिली आहे. दरम्यान, पोलीस निरीक्षक शंकर शेळके यांच्या मार्गदर्शनाखाली पीएसआय अमोल गुंजाळ, पो.ना. राजू पाटील, ईश्वर शिंदे, नाना ठाकरे, हवालदार चंद्रकांत पाटील यांचे पथक पुढील तपास करीत आहे.