जळगाव (प्रतिनिधी) – कटलरीचे साहित्य विक्री करणाऱ्या वाहन पंक्चर झाल्यामुळे महामार्गाच्या कडेला उभे केले होते. चोरट्यांनी त्या वाहनासह साहित्य असा एकूण ७५ हजारांचा ऐवज चोरुन नेला. ही घटना दि. २५ ते दि. २७ऑगस्ट दरम्यान घडली. याप्रकरणी जिल्हापेठ पोलीस ठाण्यात अज्ञात चोरट्यांविरुद्ध गुन्हा दाखल करण्यात आला आहे.
शहरातील सिंधी कॉलनीत राहणारे चेतन सर्वानंद राजपाल (वय ४८) यांचा चष्मा, बेल्ट, हेडफोन, मोबाईल चार्जरसह कटलरी साहित्याची ओमनी कारमधून विक्री करुन आपला उदनिर्वाह करतात. दि. २५ रोजी दिवसभर व्यवसाय केल्यानंतर रात्री १० वाजता त्यांनी सर्व साहित्य (एमएच ०४, डीजे ५४६२) क्रमाकाच्या ओमनीत टाकुन घरी जाण्यासाठी निघाले परंतू त्यांच्या वाहनाचे टायर पंक्चर झाल्यामुळे त्यांनी वाहन तापी पाटबंधारे कार्यालयाच्या मागील रस्त्यावर कडेला लावून घरी निघून गेले. दुसऱ्या दिवशी त्यांच्या पत्नीची तब्येत बरी नसल्याने ते कामावर गेलेच नाही आणि गाडीचे पंक्चर देखील काढले नाही.
साहित्य न मिळाल्याने पोलिसात गुन्हा दाखल
गुरुवार दि. २७ रोजी चेतन राजपाल हे साहित्य विक्रीसाठी गेले असता, त्यांना ओमनी गाडीसह त्यातील साहित्य दिसून आले नाही. चोरट्यांनी वाहनासह त्यांच्या कारमधील २५ हजारांचे साहित्य असा एकूण ७५ हजार रुपयांचा ऐवज चोरुन नेला. राजपाल यांनी लागलीच जिल्हापेठ पोलिसात तक्रार दिली. त्यानुसार अज्ञात चोरट्याविरुद्ध गुन्हा दाखल करण्यात आला आहे.
