रावेर (प्रतिनिधी) येथील सार्वजनिक बांधकाम विभागातून सेवानिवृत्त झालेल्या कर्मचाऱ्याच्या ग्रॅज्युएटीची रक्कम बँक खात्यामध्ये जमा केल्याच्या मोबदल्यात अडीच हजाराची लाच मागणाऱ्या लिपिकाला लाचलुचपत प्रतिबंधक विभागाने आज सापळा रचून अटक केली आहे.
याबाबत वृत्त असे की, तक्रारदाराचे वडील सार्वजनिक बांधकाम विभाग, रावेर येथुन नियत वयोमानानुसार सेवानिवृत्त झालेले आहे. त्याच्या ग्रॅज्युएटीची ३ लाख ९१ हजार ७१० रुपये त्यांच्या बँक खात्यामध्ये जमा केल्याच्या मोबदल्यात २ हजार रुपये व अर्जीत रजेची येणारी रक्कम बँक खात्यामध्ये जमा करण्यासाठी ५०० रुपये असे एकुण २ हजार ५०० रुपयांची लाचेची मागणी ११ जुलै २०२१ रोजी आरोपी कनिष्ठ लिपिक शेख वसीम शेख फयाज (वय-२४, रा.रावेर, ता.रावेर, जि.जळगाव) याने तक्रारदार यांचेकडे पंचासमक्ष केली होती. लाचलुचपत प्रतिबंधक विभागाने आज सापळा रचून लिपिकाला अटक केली.
पथकाने केली कारवाई
लाचलुचपत प्रतिबंधक विभागाचे पोलीस उपअधीक्षक सतीश डी.भामरे यांच्या मार्गदर्शनाखाली पोलीस निरीक्षक संजोग बच्छाव, पोलीस निरीक्षक निलेश लोधी, सफौ.दिनेशसिंग पाटील, पोहेकॉ.अशोक अहीरे, पोहेकॉ.सुनिल पाटील, सफौ.सुरेश पाटील, पोहेकॉ.रविंद्र घुगे, पोना.मनोज जोशी, पोना.सुनिल शिरसाठ, पोना.जनार्धन चौधरी, पोकॉ.प्रविण पाटील, पोकॉ.नासिर देशमुख, पोकॉ.ईश्वर धनगर, पोकॉ.प्रदिप पोळ, पोकाॅ.महेश सोमवंशी या पथकाने कारवाई केली.
