श्रीनगर (वृत्तसंस्था) जम्मू-काश्मीरच्या कुपवाडा जिल्ह्यातील नियंत्रण रेषेजवळ घुसखोरीचे दोन प्रयत्न उधळून लावण्यात सुरक्षा दलाला यश आले. यावेळी तीन दहशतवाद्यांचा खात्मा करण्यात आला. तसेच मोठ्या प्रमाणात शस्त्रसामग्री जप्त करण्यात आली.
कुपवाडाच्या माछिल सेक्टरच्या कुमकडी आणि करनाह सेक्टरमध्ये एकाच वेळी घुसखोरीच्या प्रयत्नाबाबत गोपनीय माहिती भारतीय सैन्याला मिळाली होती. यानंतर जम्मू-काश्मीर पोलीस आणि सैन्याचे संयुक्त पथक या भागात तैनात करण्यात आले. बुधवारी सायंकाळी सात वाजता संशयास्पद हालचाली आढळल्यानंतर गोळीबार सुरू झाला. गुरुवारी सकाळपर्यंत या भागात चकमक सुरू होती. करनाह सेक्टरमध्ये देखील अशा प्रकारे सुरक्षा दल आणि दहशतवाद्यांमध्ये चकमक उडाली. दोन्ही ठिकाणी सकाळच्या सुमारास राबविण्यात आलेल्या शोध अभियानात तीन दहशतवाद्यांचे मृतदेह हाती लागल्याचे सैन्याने सोशल माध्यम ‘एक्स’वरून सांगितले. याशिवाय, ए. के. रायफल, एक पिस्तोल, चार हातबॉम्ब आणि इतर शस्त्रसामग्री जप्त करण्यात आली. कुपवाडा जिल्ह्यात जम्मू-काश्मीर पोलिसांच्या गोपनीय माहितीच्या आधारावर राबविण्यात आलेले हे सहावे अभियान होते. दहशतवादविरोधी या अभियानाद्वारे आतापर्यंत १० दहशतवाद्यांना ठार मारण्यात आले आहे. ठार झालेले हे सर्व दहशतवादी विदेशी होते.
