नवी दिल्ली (वृत्तसंस्था) टिकटॉक या सोशल मीडिया प्लॅटफॉर्मवर एका व्यक्तीने अजबच दावा केलाय. त्याच म्हणणं आहे की, २०२७ सालातून आत्ताच्या काळात तो आला आहे. एवढेच नाही तर तो २०२७ साली पृथ्वीवर वाचलेला एकमेव मनुष्य असल्याचा दावा त्याने केला आहे. दरम्यान, आपल्या दाव्याचा पुरावा म्हणून त्याने एक व्हिडीओही शेअर केला आहे. तो व्हिडीओ २०२७ मध्ये रेकॉर्ड केलं असल्याचंही त्याचं म्हणणं आहे.
टिकटॉकवर @unicosobreviviente या नावाने अकाउंट तयार केलेल्या या व्यक्तीचं नाव झेवियर असल्याचं सांगितलं जात आहे. त्याने त्या व्हिडीओत सांगितलं आहे, की या जगात एकटं राहण्याचा त्याचा तो २१९ वा दिवस आहे. रिकाम्या रस्त्यांवरून तो फिरत असल्याचं व्हिडीओत दिसत आहे. त्यानंतर तो लहान मुलांच्या बागेतही गेल्याचं दिसत आहे. तिथेही त्याच्याशिवाय अन्य कोणीही माणूस दिसत नव्हता. झेवियरने आपल्या टिकटॉक अकाउंटवर टाइम ट्रॅव्हलचे किती तरी व्हिडीओ अपलोड केलेले आहेत. २०२७ सालातून उलटा प्रवास करून तो आजच्या २०२१ मध्ये आला असल्याचा त्याचा दावा आहे. येत्या सहा वर्षांत पृथ्वीवर माणसाचं नामोनिशाणही राहणार नाही, असं त्याचं म्हणणं आहे.
झेवियरने शेअर केलेले व्हिडीओ पाहून अनेक जणांचा त्यावर विश्वास बसला असल्याचं कमेंट्सवरून दिसत आहे. अनेक जण मात्र असं म्हणत आहेत, की हा केवळ प्रसिद्धी मिळवण्यासाठी केलेला प्रकार आणि रचलेल्या कहाण्या आहेत. झेवियरने अपलोड केलेल्या एका व्हिडीओत समुद्रातून जाणारं जहाज दिसल्याचा दावा एका युझरने केला आहे. तसंच, झेवियर रिकाम्या रेस्तराँमध्ये जाऊन व्हिडीओ रेकॉर्ड करत असेल, असं एकाचं म्हणणं आहे. हे व्हिडीओज भविष्यकाळात जाऊन रेकॉर्ड केलेले आहेत, तर त्यात एकाही ठिकाणी धूळ का दिसत नाही, अशी शंकाही एकाने उपस्थित केली आहे. मात्र, तरीही त्याचे व्हिडीओ व्हायरल होत राहतात. त्याचा सर्वांत अलीकडचा व्हिडीओ त्याने स्पेनमध्ये रेकॉर्ड केला असल्याचं त्याने सांगितलं असून, त्याला आतापर्यंत ६० हजारांहून अधिक व्ह्यूज मिळाले आहेत.
