नवी दिल्ली (वृत्तसंस्था) ऑस्ट्रेलियाचा माजी फिरकीपटू शेन वॉर्न याचे ह्दयविकाराच्या झटक्याने निधन झाले आहे. तो ५२ वर्षांचा होता. १९९२ मध्ये पहिला कसोटी सामना खेळणारा शेन वॉर्न आंतरराष्ट्रीय क्रिकेटमध्ये १००० हून अधिक विकेट घेणारा दुसरा गोलंदाज आहे.
प्राप्त माहितीनुसार शेन वॉर्न याचा हार्ट अटॅकने मृत्यू झाला आहे. भारतीय क्रिकेटपटू विरेंद्र सेहवाग याने याबाबत ट्विट केले आहे. ऑस्ट्रेलियाचा दिग्गज आणि सर्वकालीन महान लेग स्पिनर शेन वॉर्न याचे वयाच्या ५२ व्या वर्षी निधन झाले आहे. वॉर्नच्या व्यवस्थापकांनी एक संक्षिप्त विधान प्रसिद्ध केले आहे. ज्यात, ‘थायलंडमधील कोह सामुई येथे शेन वॉर्नचे निधन झाले. त्याला हृदयविकाराचा झटका आला.’ असे निवेदनात म्हटले आहे.
‘शेन वॉर्न अटॅक आल्याने घरामध्येच पडला होता. वैद्यकीय कर्मचारी आणि स्टाफने त्याच्यावर घरातच उपचार करण्याचा प्रयत्न केला. मात्र, वॉर्नने कुठलाही प्रतिसाद दिला नाही. वैद्यकीय कर्मचार्यांनी सर्वोत्तम प्रयत्न करुनही त्याला वाचवता आले नाही.’ असे प्रसिद्ध केलेल्या निवेदनात म्हटले आहे.
